काठमाडौं (हाम्रो खेलकुद)– विमल घर्ती मगरसहितका ४ खेलाडीको कारवाही यथावत राख्दै अखिल नेपाल फुटबल संघ (एन्फा) को अनुशासन समितिले ले राष्ट्रिय टोलीबाट निकालिएकै मितिबाट निलम्बनको गणना गर्ने निर्णय गरेको छ ।

अनुशासन समितिले खेलाडीको अपिलपछि उनीहरुमाथिको कारवाही यथावत राख्दै निलम्बनको मिति भने कात्तिक ३० गतेबाट लागु हुने निर्णय गरिएको एन्फाले आफ्नो वेभसाइटमार्फत जनाएको छ ।

अनुशासन उल्लघंन गरेको भन्दै एन्फाले मंसिर २७ गतेबाट लागु हुने गरि विमल, अन्जन विष्ट, दीनेश राजवंशी र सन्तोष तामाङलाई निलम्बन गरको थियो । विमल र दीनेशलाई ९० दिन तथा अन्जन र सन्तोषलाई ४५ दिन निलम्बनसहित ५० हजार रुपैयाँ जरिवाना तोकेको थियो ।

मंसिर ३० गते चारै खेलाडीले गल्ति स्वीकार गर्दै कारवाही अवधि घटाइदिन अपिल कमिटि समक्ष निवेदन दिएका थिए । तर, एन्फाले कारवाही यथावत राख्दै घटना भएको भोली पल्ट अर्थात कात्तिक ३० गतेबाट निलम्बनको गणना गर्ने निर्णय गरेको छ ।

अब अन्जन र सन्तोषको निलम्बन भने पुस १५ बाट फुकुवा हुनेछ । विमल र दीनेशको हकमा भने माघको ३० गते उनीहरुमाथिको निलम्बन फुकुवा हुनेछ । अन्जन र सन्तोषले जारी कतार एयरवेज सहिद स्मारक ए डिभिजन लिगमा अबका दुई चरणका खेल गुमाउँछन् । यसअघिका २ खेल उनीहरुले गुमाइसकेका छन् ।

४ खेलाडीले मंसिर ३ गते कुवेतसँगको विश्व कप छनोट खेल्नका लागि भुटान जानुअघि अघिल्लो राती डिस्को गएर मादक पदार्थ सेवन गरेको भन्दै समाचार सार्वजनिक भएपछि एन्फाले कारवाही गरेको थियो । भुटान जानका लागि कात्तिक ३० गते एन्फा पुगेपनि कारवाही सुनेपछि ४ जना घर फर्केका थिए ।

निलम्बनकै कारण विमल, अन्जन र दिनेश दुई साता अघि स्वदेश मै सम्पन्न १३ औं दक्षिण एसियाली खेलकुद (साग) यू २३ टोलीबाट हटाइएका थिए । मंसिर २४ गते भएको फाइनलमा भुटानलाई हराउँदै नेपालले सागमा लागतार दोस्रो पटक स्वर्ण पदक जितेको थियो । सन् २०१६ को १२ औं संस्करणमा नेपालले स्वर्ण पदक जित्दा विमल, अन्जन र दीनेश तीनै जना टोलीका सदस्य थिए ।