काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग अन्तगत सातौ राउन्डको तेस्रो दिन आज (आइतबार) दुई खेल हुदैछ ।

एन्फा कम्प्लेक्समा हुने दिनको पहिलो खेलमा न्युरोड टिम (एनआरटी) र विभागीय नेपाल एपीएफबीच बिहान ११ः३० बजे तथा दोस्रो खेलमा फ्रेन्ड्स र सरस्वतीबीच दिउँसो ३ बजे प्रतिस्पर्धा हुँदैछ ।

अंक दुरी खासै फरक नहुदा सरस्वती र फ्रेण्ड्स लिगको रेलिगेसन जोनमा रहेका टोली हुन् । यही रेलिगेशन जोनको नजिक रहेका फ्रेन्ड्स र सरस्वती आइतबारको सातौ चरणको खेलमा आमने सामुने हुँदैछन् ।

जित निकाल्दै फ्रेण्ड्स र सरस्वती रेलिगेशन जोनबाट उम्कने दाउँमा हुनेछ । फ्रेन्ड्स दोस्रो जितको खोजीमा छ । सरस्वती पहिलो जित निकाल्न चाहन्छ । जितविहीन सरस्वतीले ५ हार र एक बराबरको नतिजा निकालेको छ । त्यसैले पनि सरस्वती पहिलो जित निकाल्दै रेलिगेसनबाट उम्कने दाउमा हुनेछ । छैटौं राउन्डमा बीबीसीसँग गोलरहित बराबरी खेल्दै सरस्वतीले लिगमा पहिलो अंक जोडेको थियो ।

अघिल्लो खेलमा ललितपुर डर्वीमा रुस्लान थ्री स्टार क्लबलाई १–० ले पराजित गरेको फ्रेन्ड्स सरस्वतीविरुद्ध उच्च मनोवलमा मैदानमा उत्रनेछ । फ्रेन्ड्स १ जित, ३ हार र २ बराबरीसहित ५ अंक जोडेर तलिकाको १२औं स्थानमा छ ।

दिनको पहिलो खेलमा एनआरटी र एपीएफ खेल हुदैछ । एपीएफ लिगमा दोस्रो जितको खोजीमा हुनेछ । एपीएफले १ जित, ३ हार र २ बराबरीसहित ५ अंक जोडेको छ । एनआरटीविरुद्ध जित निकाले एपीएफ रेलिगेसन जोन छाड्ने छ । एनआरटी चौथो जित निकाल्दै शीर्ष ६ मा पर्ने दाउमा हुनेछ । एनआरटी ३ जित, २ हार र १ बराबरीसहित ८ अंक जोडेर सातौ स्थानमा छ ।