काठमाडौं (हाम्रो खेलकुद) – कतार एयरवेज सहिद स्मारक ए डिभिजन लिग अन्तर्गत सातौं चरणको अन्तिम दिन आज दुई खेल हुँदैछ ।

सातदोबाटोस्थित एन्फा कम्प्लेक्समा मध्यान्ह १२ बजे हुने दिनको पहिलो खेलमा ब्रिगेड ब्वाईज क्लब (बिबिसी) र संकटा क्लब भिड्दैछन् । त्रिपुरेश्वरमा दिउँसो ३ बने विभागीय त्रिभुवन आर्मी र च्यासल युथ क्लबबीच खेल हुने छ ।

उपाधि दावेदार आर्मी च्यासललाई पराजित गर्दै शीर्षस्थानमा स्पष्ट ३ अंकको अग्रता लिने लक्ष्यमा मैदानमा उत्रनेछ । आर्मीलाई यो अग्रता बढाउने अवसर पनि रहेको छ । गत साता संकटासँग १-१ गोलको बराबरीमा रोकिएपछि आर्मीले शीर्षस्थानमा उक्लने मौका गुमाएको थियो । कम्तिमा बराबरीको नतिजाले समेत आर्मी शीर्षस्थानमा उक्लनेछ । पराजित भएको अवस्थामा उपाधि सम्भावना जिवितै रहने भएपनि शीर्षस्थानमा उक्लने मौका गुमाउने छ।

कप्तान भरत खवास, नवयुग श्रेष्ठ, जर्जप्रिन्स कार्की, सन्तोष तामाङ, सेसेहाङ आङदेम्बे, दिनेश हेन्जन, बिकास खवास, सुमन अर्याल र बिकेश कुथु जस्ता नाम चलेका खेलाडीको साथ आर्मीलाई छ। उनीहरुले जुनसुकै बेला पनि नतिजा आफ्नो पक्षमा पार्न सक्ने क्षमता राख्दछन् । आर्मीले ४ जित, १ बराबरी र १ हारबाट १३ अंक जोडेको छ ।

 

यता, लिगमा १ सय गोलको आँकडा पार गरेको सन्तोष साहुखलको साथ पाएको च्यासल आर्मीलाई स्तब्ध पार्दै अंक तालिकामा सुधार गर्ने लक्ष्यमा हुनेछ । सुरुवाती दुई खेलमा दमदार सुरुवात गरेको च्यासलको प्रदर्शन त्यसपछि अपेक्षाकृत हुन सकेको छ । च्यासल ६ खेलबाट ६ अंक बटुल्दै तालिकाको १२औं स्थानमा छ ।

सोमबारै दिनको पहिलो खेलमा बिबिसी र संकटाबीच खे हुनेछ । अंक तालिकामा मध्यस्थानमा रहेको यी दुई टोलीबीचको खेल रोमाञ्चक र प्रतिस्पर्धात्मक हुने अनुमान गरिएको छ । संकटा ६ खेलमा संकटा २ जित, २ बराबरी र २ हारसहित ८ अंक जोडेर आठौं स्थानमा रहँदा बिबिसी २ जित, ३ हार र १ बराबरी गर्दै ७ अंक जोडेर १०औं स्थानमा छ ।

राष्ट्रिय टिमका पुर्व कप्तान अनिल गुरुङको कप्तानीमा रहेको बिबिसीले सोमबार चार विदेशी खेलाडी मैदानमा उतार्दै संकटालाई पराजित गर्ने लक्ष्यमा हुनेछ । गत सिजनको उपविजेता संकटा पनि बिबिसीलाई पराजित गर्दै अंक तालिकामा सुधार गर्ने लक्ष्यमा हुनेछ ।