काठमाडौं (हाम्रो खेलकुद)– राष्ट्रिय फुटबल टोलीका कप्तान एवंम् गोलकिपर किरण चेम्जोङ सम्मलित पन्जाब एफसीले आई लिगमा तेस्रो जित हासिल गरेको छ । सोमबार घरेलु मैदानमा पन्जाबले गोकुलम केरेलालाई ३–१ ले हराएको थियो ।
पन्जाबको लुधियानास्थित गुरु नानक रंगशालामा पहिलो हाफको इन्ज्युरी समयमा सर्जियो बार्बोजाले पन्जाबका लागि पहिलो गोल गरे । तर हेनरी किसिकाले ५२ औं मिनेटमा गोल गर्दै गोकुलमका लागि बराबरी गोल गरे ।
६४ औं मिनेटमा असेर डिपान्डाले गोल गर्दै पन्जाबलाई पुनः अग्रता दिलाए । इन्जुरी समयको दोस्रो मिनेटमा डिपान्डाले अर्को गोल थप्दै जित पक्का गरे । किरणले सोमबार पुरा समय खेलेका थिए । पन्जाबले पछिल्लो दुई खेलमा बराबरी खेलेको थियो ।
नवौं खेलमा टोलीको यो तेस्रो जित हो । ५ खेलमा बराबरी गरेको पन्जाबले सिजनमा एक खेल गुमाएको थियो । पन्जाब १४ अंकका साथ अंकतालिकाको दोस्रो स्थानमा रहेको छ । मोहन बगान १७ अंकका साथ शीर्षस्थानमा रहेको छ । पन्जाबको भन्दा मोहन बगानले १ खेल कम खेलेको छ । ११ टोलीको सहभागिता रहेको लिगमा ७ खेलमा १० अंक जोडेको गुकुलम पाँचौं स्थानमा छ ।
