काठमाडौं (हाम्रो खेलकुद)– मदन भण्डारी स्पोर्टस् एकेडेमीले अर्को महिना नेपालसहित ४ राष्ट्रका फुटबल टोली सम्मिलित अन्तर्राष्ट्रिय फुटबल प्रतियोगिता आयोजनाको तयारी गरिरहेको छ ।

एकेडेमीले गत वर्ष नै मदन भण्डारी अन्तर्राष्ट्रिय फुटबल प्रतियोगिताको घोषणा गरेपनि त्यतिबेला दशरथ रंगशाला तयार नभएका कारण अहिले आयोजना गर्ने तयारी गरेको एकेडेमीका अध्यक्ष विनोद श्रेष्ठले जानकारी दिए । उनका अनुसार प्रतियोगिता फागुन १७ देखि २४ गतेका लागि दशरथ रंगशालामा प्रस्ताव गरिएको छ ।

दक्षिण एसिया भन्दा बाहिरका दुई राष्ट्रलाई प्रतियोगितामा सहभागि गराउने प्रयास भइरहेको र केहि दिनमा त्यसको टुंगो लागेपछि सार्वजनिक गरिने अध्यक्ष श्रेष्ठले जानकारी दिए । ‘गत वर्ष रंगशाला तयार नभएका कारण आयोजना हुन सकेन । अब रंगशाला तयार भइसकेको छ,’ उनले भने,‘ अब हामी सबै हिसाबले तयार छौं । ’

एकेडेमीले दुई वर्षअघि बुटवलमा मदन भण्डारी गोल्डकप आयोजना गरेको थियो । त्यसपछि एकेडेमी अन्तर्गतकै क्रिकेट विभागले टियु मैदान परिसरमा क्रिकेट कार्निभल समेत आयोजना गरेको थियो ।

मंसिरमा १३ औं दक्षिण एसियाली खेलकुद (साग) क्षेत्रीय टोलीको प्रतिस्पर्धा नेपाली दर्शकहरुले हेरिसकेकाले त्यो भन्दा पनि प्रतिस्पर्धात्मक प्रतियोगिता होस् भन्नका लागि पहल थालिएको उनले बताए । अखिल नेपाल फुटबल संघ (एन्फा) को प्राविधिक सहयोगमा हुने प्रतियोगितामा विदेशी टोलीका लागि एन्फासँग पनि समन्वय भइरहेको अध्यक्ष श्रेष्ठले बताए ।

श्रेष्ठले नेपाल बाहेक दक्षिण एसियाको एउटा टोली र त्यसबाहेक एसियाका दुई टोली हुन सक्ने बताए । ‘माल्दिभ्स, बंगलादेश र भुटान मध्ये एउटा हुन सक्ने सम्भावन छ ,’ उनले भने,‘ अन्य देशको केहि दिनमा टुंगो लाग्नेछ ।’ राउन्ड रोविन लिगपछि शीर्ष २ टोलीले फाइनल खेल्ने उनले बताए ।

गतवर्ष एकेडेमीले पत्रकार सम्मेलन गर्दा विजेताले २५ हजार अमेरिकी डलर, दोस्राले १० हजार डलर प्राप्त गर्ने घोषणा गरेको थियो । नेपालले मार्चमा विश्वकप छनोटको खेलहरु पनि आयोजना गर्ने कार्यक्रम रहेको छ ।