काठमाडौं (हाम्रो खेलकुद)– घरेलु फुटबलमा मैदानमा मात्र होइन मैदान बाहिर पनि हातपातका घटना हुन थालेका छन् । पोखरामा एउटा प्रतियोगिताका दौरान अखिल नेपाल फुटबल संघ (एन्फा) कास्कीका अध्यक्ष मिलन गुरुङ कुटिएका छन् । अध्यक्ष मिलनलाई गण्डकी प्रदेश सांसद दिपक मनाङेका नामले परिचत राजीव गुरुङले हातपात गरेका हुन् ।

पोखरा महानगरपालिका २९ लेखनाथको भण्डारढिकस्थित खेल मैदानमा मंगलबार प्रथम मुख्यमन्त्री कप फुटबलको उद्घाटन अघि नै उक्त घटना भएको थियो । सांसद गुरुङको डाँफे युवा क्लबलाई आफुले भने अनुसारको सुविधा नदिएको भन्दै आफुलाई हातपात गरेको एन्फा कास्कीका अध्यक्ष गुरुङले आरोप लगाएका छन् । कास्की अध्यक्ष गुरुङका अनुसार सांसद गुरुङले एन्फा अध्यक्ष कर्मा छिरिङ शेर्पालाई पनि सार्वजनिक रुपमै गालीगलौज गरेका थिए ।

‘उहाँको क्लबलाई ५/६ दिन अघिदेखि नै होटल र अभ्यासको लागि मैदानको सुविधा दिनुपर्छ भन्दै विवाद गर्नुभयो । मैले नियमअनुसार प्रतियोगिताको एकदिन अघि र टोलीको अन्तिम खेलको भोलीपल्ट सम्म दिन सकिन्छ भने,’ हाम्रो खेलकुदसँग उनले टेलिफोनमा भने, ‘उद्घाटनअघि त्यहि विषयमा विवाद गर्दै मलाई हात हाल्नु भयो । एक मुक्का , एक लात्ती हान्नु भयो । ’

उनले आफुले मुख्यमन्त्रीले उद्घाटन गर्ने कार्यक्रम खल्लो हुने भएकोले आफुले संयमता अपनाएको दाबी गरे । अध्यक्ष गुरुङले शान्ति सुरक्षा र सांसद गुरुङलाई कारवाही गर्न कास्की जिल्ला प्रशासनमा उजुरी दर्ता गाउन लागेको जानकारी दिए । ‘ज्यानको सुरक्षा नभइ कसरी प्रतियोगिता गर्न सकिन्छ । भोली प्रतियोगिताका खेल हुन्छ हुँदैन म अहिले भन्न सक्दिन,’ अध्यक्ष गुरुङले थपे, ‘हाम्रो सुरक्षा पनि हुनुपर्दछ । सांसद गुरुङलाई कारवाही हुनुपर्छ । ‘

गण्डकी प्रदेशका मुख्य मन्त्री पृथ्वी सुब्बा गुरुङले उद्घाटन गरेको प्रतियोगितामा प्रदेशका ११ जिल्लाका ९ टोलीको सहभागिता रहेको छ । प्रतियोगिताको विजेताले ५ लाख र दोस्रो टोलीले ३ लाख रुपैयाँ प्राप्त गर्नेछ ।