काठमाडौं (हाम्रो खेलकुद) –लिगको आठौं चरणको पहिलो दिन बुधबार एक मात्र खेलमा उपाधि दावेदार मछिन्द्र र विभागीय नेपाल पुलिसक्लब बीच प्रतिस्पर्धा हुदैछ । खेल दिउँसो ३ बजेपछि त्रिपुेश्वस्थित दशरथ रंगशालामा हुनेछ ।

मछिन्द्र ७ खेलबाट १३ अंक जोडेर दोस्रो स्थानमा छ । ४ जित २ बराबर र १ हारको नतिजा छ । ७ खेल खेलेको पुलिसको ११ अंक रहेको छ । पुलिस ३ जित, २ बराबरी र २ हारको नतिजासहित तालिकाको छैटौ स्थानमा छ ।

पुलिसलाई पराजित गर्दै मछिन्द्र शीर्षस्थानमा उक्लने दाउमा हुनेछ । पुलिसलाई पराजित गर्न सकेको अवस्थामा मछिन्द्रले शीर्ष स्थानको आर्मीसँगको अंक बराबरी गर्नेछ । बराबरी या हारले भने मछिन्द्रको उपाधि यात्रामा धक्का लाग्नेछ । दुई खेलको प्रतिबन्ध खेपेका डिफेन्डर देवेन्द्र तामाङ, फरवार्ड दीपक राई र अर्का डिफेन्डर विजय धिमालले पुलिसविरुद्धको खेलबाट पूनरागमन गर्नेछन् ।

पाँचौ चरणमा मनाङसँग २–२ गोलको बराबरीपछि झडप हुँदा उनीहरुले दुई खेलको प्रतिबन्ध भोगेका थिए । त्यसपछि मछिन्द्रले जावलाखेलमाथि १–० को झिनो जित निकाल्दा शेर्पासँग २–० ले स्तब्ध हुन पुगेको थियो । स्टार खेलाडीले भरिएको मछिन्द्रसँग विराज महर्जन, सुजल श्रेठ, विशाल राई, अभिषेक रिजाल, रेजिन सुब्बा, रेजिन धिमाल र योगेश गुरुङजस्ता नाम चलेका खेलाडीहरुको साथ छ ।

पुलिसविरुद्ध मछिन्द्रले स्ट्राइकर विशाल राई ‘ए’ लाई पनि खेलाउन सक्नेछ । मछिन्द्रले मंगलबार मात्रै विशाल राई ‘ए’ लाई क्लबमा सम्झौता नवीकरण गरेको छ । उनले गत सिजन पनि मछिन्द्रबाटै लिग खेलेका थिए ।

यता, लिगमा औसतको प्रदर्शन गरिरहेको पुलिस मछिन्द्रलाई स्तब्ध पार्दै लिगको दोस्रो स्थानमा उक्लने दाउमा हुनेछ । तर स्टार खेलाडीले भरिएको मछिन्द्रलाई पराजित गर्न पुलिसलाई गाह्रै हुनेछ । सुमन लामा, भोला सिलवाल, रविन श्रेष्ठ, अजित भण्डारी र रवि पासवान जस्ता राष्ट्रिय टोलीका खेलाडीको पुलिसलाई साथ छ ।