काठमाडौं (हाम्रो खेलकुद) – राष्ट्रिय महिला फुटबल टोली एवंम् नेपाल एपिएफ क्लबकी फरवार्ड सावित्रा भण्डारी ‘सम्बा’ सम्मिलित गोकुलम केरेला एफसी शुक्रबार सुरु हुने महिला भारतीय (आई) लिगका लागि छनोट भएको छ ।

२ लेगको छनोटमा एफसी अलकापुरालाई समग्रमा पराजित ९–१ गर्दै गोकुलम चौथो संस्करणको आइलिगका लागि छनोट भएकी थिइन् । बुधबार भएको दोस्रो लेगको पहिलो रोजाईमा रहेकी सावित्राले २ गोल गरेपछि गोकुलमले अलकापुरालाई ८–१ ले हराएको थियो ।

कमलाले ह्याट्रिक गरेको उक्त खेलमा दयाले २ गोल र मनिषाले १ गोल गरेकी थिइन् । आइतबार भएको पहिलो खेलमा गोकुलम १–० ले विजयी भएको थियो । सावित्रा मंगलबार मात्रै त्यसतर्फ प्रस्थान गरेकी थिइन् ।

उनीसँगै राष्ट्रिय टोली एवंम् एपिएफकी मिडफिल्डर अनित बस्नेत पनि भारत प्रस्थान गरेकी थिइन् । यसपटक भने सावित्रा र अनिताले अलग अलग क्लबबाट खेल्ने छन् । अनिताले साविक विजेता सेथु एफसीबाट खेल्ने छिन् ।

गत सिजन भने दुवैले सेथुबाट खेलेका थिए । सेथु गत वर्षको विजेता हो । फाइनलमा सावित्राले २ गोल गरेपछि मणिपुर पुलिस स्पोर्टस्लाई ३–१ ले हराउँदै सेथु च्याम्पियन बनेको थियो । सावित्राले लिग भर १५ गोल गरेकी थिइन् । सावित्रा र अनिताले दुई वर्षअघि माल्दिभ्समा फुटसल लिग पनि खेलेका थिए ।

बंगलुरुस्थित बैंगलोर फुटबल रंगशालामा फागुन २ गते सम्म चल्ने आइ लिगमा गत वर्ष जस्तै १२ टोलीको सहभागिता रहनेछ । सहभागी टोलीलाई २ समूहमा विभाजन गरि राउन्ड रोविन लिग र त्यसमा शीर्ष २ मा पर्ने टोली सेमिफाइनलमा पुग्नेछन् ।

सावित्रा सम्मलित गोकुलमसहित समूह ‘बी’ बैंगलोर युनाइटेड एफसी, विदेश ११ एफसी, ओडिसा पुलिस एफसी, केन्क्रे एफसी, श्री भूमि एफसी छन् । अनिता सम्मिलित सेथुसहित बारोडा फुटबल एकेडेमी, बिबिके एफसी, एफसी कोहलपुर सिटी र किक स्ट्राट एफसी समूह ‘ए’ मा छन् ।