काठमाडौं (हाम्रो खेलकुद) – कतार एअरवेज सहिद स्मारक ए डिभिजन लिग अन्तर्गत आठौं चरणको अन्तिम दिन दुई खेल हुँदैछ । दशरथ रंगशालामा हुने पहिलो खेलमा त्रिभुवन आर्मी क्लब र न्यु रोड टिम (एनआरटी) भिड्नेछन् ।

आर्मी लिग तालिकाको शीर्षस्थानमा ३ अंकको अग्रता कायम गर्न आतुर छ । मछिन्द्र र मनाङले आ-आफ्नो खेलमा जित दर्ता गरेपछि अंक फेरि पनि बराबर भएको छ ।

यस्तो अवस्थामा एनआरटीलाई पराजित गर्दै शीर्षस्थानमा चढ्न आर्मीले राम्रो प्रदर्शन गर्नुपर्ने हुन्छ । पछिल्लो केहि खेलमा एनआरटि उच्च लयमा देखिएको छ ।

एनआरटीले आजको खेलमा जित दर्ता गरेको खण्डमा आफैंपनि शीर्षस्थानबाट २ अंक मात्र पछाडी रहनेछ । पछिल्लो दुवै खेलमा विभागीय टोली पुलिस र एपीएफलाई पराजित गरेको एनआरटि विभागमाथि क्लिन स्विप गर्ने सुरमा हुनेछ ।

लिगमा १० गोल गरेको एनआरटीका लागि आर्मीका पूर्व खेलाडी एरिक विष्ट मुख्य खेलाडी हुनेछन् ।

आर्मी जारी लिगमा सर्वाधिक गोल गर्ने र कम गोल खाने टोली हो । निकै सन्तुलित टोली लिएर लिग उपाधि लक्ष्यमा अग्रसर प्रशिक्षक नवीन न्यौपाने आफैंपनि एनआरटीबाट खेलेका थिए ।

प्रशिक्षक राजुकाजी शाक्यविरुद्ध नवीनको टोलीले निकै मिहिनेत गर्नुपर्ने देखिन्छ । डिफेन्समा युद्ध शाही प्रतिबन्धपछि उपलब्ध हुनुले केहि राहत हुनसक्छ ।

दिनको दोस्रो खेलमा फ्रेन्ड्स क्लब र संकटा भिड्नेछन् । अंक तालिकाको तल्लो हाफमा रहेका दुवै टोली यस खेलमा जित हात पारे रेलिगेसनबाट मुक्त रहने पक्का हुनेछ । संकटाको ९ अंक छ भने फ्रेन्ड्सले ८ अंक जोडेको छ ।

पछिल्लो खेलमा विदेशी खेलाडीको प्रदर्शनले फ्रेन्ड्सको मनोबल उच्च छ । ब्रिगेड ब्वाइजसँग गोलरहित बराबरीमा रोकिएपछि केहि दवावमा रहेको संकटा जितसँगै शीर्ष ६ को लक्ष्यलाई सुदृढ बनाउन चाहन्छ ।