एजेन्सी – विश्व फुटबलमा सबैभन्दा रोमाञ्चक र प्रतिस्पर्धात्मक मानिने स्पेनिस ला लिगाको बार्सिलोना र रियल म्याड्रिडबीचको दोस्रो (एल क्लासिको) आज हुँदैछ ।

सिजनको दोस्रो एल क्लासिको रियलको घरेलु मैदानमा सान्टियागो बर्नबेउमा नेपाली समयअनुसार रात १ः४५ बजे हुनेछ । उपाधि होडमा रहेका यि दुई कट्टर टोलीबीचको भिडन्त रोमाञ्चक र प्रतिस्पर्धात्मक हुने अनुमान गरिएको छ । कुनै एक टोलीले खेल आफ्नो पक्षमा पारेको अवस्थामा सम्भवत यो नै स्पेनिस ला लिगाको उपाधि छिनोफानो गर्ने खेलको रुपमा रहन सक्नेछ ।

शीर्षस्थानमा रहेको बार्सिलोनाको २५ खेलबाट ५५ अंक छ । उति नै खेलबाट रियलको ५३ अंक छ । घरेलु मैदानमा बार्सिलोनालाई पराजित गर्न सके रियल एक अंकको अग्रतासहित शीर्षस्थानमा उक्लनेछ । पराजित या बराबरी भएको अवस्थामा रियालको उपाधि यात्रा झिनो बन्ने छ ।

यता, बार्सिलोना घरेलु टोलीलाई पराजित गर्दै उपाधि यात्रालाई थप मजवुत बनाउने लक्ष्यमा हुनेछ । रियलाई हराउन सके बार्सिलोनाले ५ अंकको अग्रता बनाउनेछ । बराबरीले पनि बार्सिलोना रियलभन्दा २ अंकले अघि हुनेछ । यस्तो अवस्थामा यो खेल दुवै टोलीका लागि उत्तिकै महत्वपुर्ण रहेको छ । पछिल्लो पटक गत डिसेम्वरमा यि दुई टोलीले गोलरहित बराबरी खेल्दै अंक बाँडेका थिए ।

पछिल्ला पाँच खेलमा रियलले एक खेलमा मात्रै जित निकाल्दा २ हार र एक बराबरीको नतिजा निकालेको छ । रियल बार्सिलोनालाई पराजित गर्दै पुनः जितको लयमा फर्कने दाउमा हुनेछ ।

यता, बार्सिलोनाले पछिल्लो पाँच खेलमा ३ जित र समान १ हार र १ बराबरीको नतिजा निकालेको छ । बार्सिलोना पछिल्लोपटक च्याम्पियन्स लिगमा नेपोलीसँग १-१ गोलको बराबरी खेलेको थियो । यस्तोमा दुवै टोली जितको लय समात्ने दाउमा हुनेछ ।

रियलसँग करिम बेन्जेमा, ग्यारेथ बेल, भिनिसियस जुनियर, क्यासमिरो, टोनी क्रुस, लुका मोड्रिच, सर्जियो रामोस, फरल्यान्ड मेन्डी, फेडरिको भेल्भर्डे र इस्कोको साथ रहनेछ । यता, बार्सिलोनासँग कप्तान लियोनेल मेस्सीसँगै एन्टोइन ग्रिजमन, आर्टुरो भिडाल, अर्थर, फ्रान्की डि जोङ र जुनियर फिर्पाे जस्ता खेलाडीको साथ रहनेछ ।

हेड टु हेड

रियल म्याड्रिड र बार्सिलोना हालसम्म २७६ पटक अमाने समाने भएका छन् । जसमा बार्सिलोना ११५ पटक विजयी हुँदा रियलले बार्सिलोनालाई ९९ पटक हराएको छ । ६२ खेल भने बराबरीमा सकिएको छ । ला लिगामा यि दुई टोली १७९ पटक प्रतिस्पर्धा गरेका छन् । जसमा दुवै टोलीले समान ७२–७२ खेल जित्दा ३५ खेल बराबरीमा सकिएको छ ।

यस्तो अवस्थामा आइतबार राति रियललाई दुई स्वर्णिम अवसर रहेको छ । यो खेलमा बार्सिलोनालाई हराए रियलले १०० क्लासिको खेल जित्ने इतिहास बनाउनेछ । यस्तै ला लिगामा धेरै क्लासिको जित्ने अवसर पनि बनाउने छ । यि दुई टोलीबीचको पछिल्लो पाँच खेलको नतिजा हेर्दा बार्सिलोना नै हावी रहेको छ । रियलले ३ खेल गुमाउदा २ बराबरीको नतिजा निकालेको छ ।