काठमाडौं (हाम्रो खेलकुद) – नेपाली राष्ट्रिय टोली तथा ‘ए’ डिभिजनको च्यासल युथ क्लबका गोलरक्षक एलेन न्यौपानेले आफू व्यक्तिगत भ्रमणमा अष्ट्रेलिया प्रस्थान गरेका बताएका छन् ।

विभिन्न सञ्चारमाध्यममा एलन अष्ट्रेलियामै बसोबास गर्ने भन्नेबारे समाचार आएपछि एलनले आफू केहि साताको लागि मात्र अष्ट्रेलिया आएको बताए । उनले केहि कार्यक्रममा सहभागी हुनुका साथै स्थानिय नेपाली क्लबका लागि फुटबल समेत खेल्ने कार्यक्रम रहेको बताए ।

यता एलेन चार महिना फुटबलकै लागि शनिबार अष्ट्रेलिया प्रस्थान गरेको च्यासल क्लबले जनाएको छ । च्यासलले एलेन चार महिनाको लागि अष्ट्रेलिया गएको र अष्ट्रेलियाबाट फर्केपछि पुनः च्यासलबाटै खेल्ने बताएको छ । क्लबका एक पदाधिकारीले उनलाई जापानमा लैजाने तयारी भएपनि सबै कागजहरु अष्ट्रेलियामा जान मिलिसकेकाले रोक्न नसकेको बताए । ति पदाधिकारीले एलेन अष्ट्रेलियाबाट फर्केलगत्तै जापानको लागि प्रक्रिया थालिने पनि बताएका छन् ।

‘ए’ डिभिजन लिगमा औसतको प्रदर्शन गरेका एलेन घरेलु मैदानमा अर्काे महिना हुने फिफा विश्वकप कतार २०२२ तथा एएफसी एसियन कप चीन २०२३ छनोट अन्तर्गत चाइनिज ताइपेइ र अष्ट्रेलियाविरुद्धको खेलको लागि ३१ सदस्यीय प्रारम्भिक सुचीमा समेटिएका थिए । तर, उनी अष्ट्रेलिया जानुपर्ने भएपछि नेपाली राष्ट्रिय टोलीका स्वीस मुख्य प्रशिक्षक योहान कालिनले लिगमा उत्कृष्ट गोलरक्षक चुनिएका नेपाल आयल निगम मनाङ मर्स्याङ्दी क्लबका पहिलो रोजाईका गोलरक्षक दीप कार्कीलाई टोलीमा समेटेका छन् ।

राष्ट्रिय टोलीले आजदेखि प्रशिक्षण शुरु गरेको छ । अधिकांश खेलाडी मोफसलको गोल्डकपमा व्यस्त रहेका कारण काठमाडौंमा उपलब्ध खेलाडीहरु समेटेर टोलीको प्रशिक्षण थालिएको हो ।
नेपालले चैत्र १३ मा चाइनिज ताइपेइ तथा चैत्र १८ मा अस्ट्रेलियासँग प्रतिस्पर्धा गर्नेछ ।

दुवै खेल दशरथ रंगशालामा साँझ ५ बजेपछि हुने अखिल नेपाल फुटबल संघ (एन्फा) ले जनाएको छ । नेपाल विश्वकप छनोटको सुरुवाती ५ खेलमा १ जितका साथ ३ अंकसहित चौथो स्थानमा छ ।