दिपक बोहोरा, इलाम

लिग उपाधि जितेको एक सातामा सताक्षी गोल्डकप जितेर मोफसलका प्रतियोगितामा सुखद सुरुवात गरेको मचिन्द्र क्लब इलाममा जारी छैटौं माईभ्याली गोल्डकपमा टाइब्रेकरमा जित निकाल्दै सेमिफाइनल प्रवेश गरेको छ ।

स्टार खेलाडीले भरिएको मछिन्द्र कठिन जितका साथ सेमिफाइनल प्रवेश गरेको हो । गोर्खा ब्वाईज फुटवल क्लब रुपन्देहीलाई ट्राईब्रेकरमा ५–३ गोलले हराउदै मच्छिन्द्रले सेमिफाईनलको यात्रा तय गरेको हो ।  सोमबार इलामको ठूलो टुँडीखेलमा सम्पन्न क्वाटर फाईनल खेलको निर्धारित समयमा र थपिएको २० मिनेटमा दुबै टिमबाट गोल हुन नसके पछि खेल टाइब्रेकरमा गएको थियो ।

टाइब्रेकरमा मछिन्द्रका रजिन धिमाल, बुद्ध चेम्जोङ,दिनेश राजवंशी, बिमल घर्ति मगर, देवेन्द्र तामाङको प्रहार गोलमा परिणत हुँदा गोर्खा ब्वाइजको सञ्जिव लामा, गौतम श्रेष्ठ र फोडे फोफानाको प्रहार मात्र गोल भएको थियो । विदेशि खेलाडी हम्जातको प्रहार पोलमा लागेर फकिर्दा गोर्खा निराश बन्न पुग्यो ।

मच्छिन्द्र क्लबका रजिन धिमाल खेलको म्यान अफ दि म्याच घोषित हुँदै नगद १० हजार रुपियाँ प्राप्त गरे । लिग च्याम्पियन मछिन्द्रसहित ए डिभिजनका ३ क्लब त्रिभुवन आर्मी क्लब, संकटाको सहभागिता रहेको प्रतियोगितामा १० टोलीको सहभागिता रहेको छ । फागुन २४ गते सम्म चल्ने गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।

मंगलबारको खेल

आयोजक माइभ्याली फुटबल क्लब र मोहम्मडन स्पोर्टिङ क्लब कोलकत्ता