पोखरा (हाम्रो खेलकुद) – सहारा क्लब पोखराले नेपाली राष्ट्रिय फुटबल टोली तथा लिग च्याम्पियन सान मिगेल मछिन्द्र क्लबका उपकप्तान सुजल श्रेष्ठलाई सम्मान गर्ने भएको छ ।

सहाराले विगतको वर्षमा झै यसपटक पनि ‘सर्वाेत्कृष्ट राष्ट्रिय फुटबल खेलाडी सम्मान २०७६’ बाट सुजललाई सम्मान गर्न लागेको हो ।

यससँगै सुजल सहाराबाट सम्मान पाउने तेस्रो खेलाडी हुनेछ । यसअघि सहाराले नेपाली राष्ट्रिय टोलीका उपकप्तान तथा त्रिभुवन आर्मी क्लबका कप्तान भरत खवास र गतवर्ष नेपाली राष्ट्रिय टोलीका कप्तान किरण चेम्जोङलाई ‘सर्वाेत्कृष्ट राष्ट्रिय फुटबल खेलाडी सम्मान’ बाट सम्मानित गरेको थियो । श्रेष्ठलाई ३५ हजार रुपैयाँ, प्रमाणपत्र र दोसल्लासहित सम्मान गरिने छ । ३५ हजार पुरस्कारको प्रायोजन सहारा क्लब पोखराका मानार्थ सदस्य खेमबहादुर गुरुङले गरेका हुन् ।

आहा ! रारा गोल्डकपको आयोजक सहाराले १८औं संस्करणको आहा रारा गोल्डकपको उद्घाटनको अवसरमा सुजललाई सम्मानित गर्ने क्लबका महासचिव रामजीप्रसाद अधिकारीले जानकारी गराए । १८औं संस्करणको आहा रारा गोल्डकप यही बिहीबारदेखि आयोजना हुदैछ । पोखरा रंगशालामा हुने उद्घाटन खेलमा आयोजक सहारा क्लबले ‘ए’ डिभिजनको ब्रिगेड ब्वाइज क्लबको सामना गर्नेछ ।

धनकुटाका सुजल सन् २०११ देखि नियमित रुपमा राष्ट्रिय टोलीमा रहँदै आएका छन् । उनले यसपटक एक मैत्रीपुर्ण खेलमा नेपालको कप्तानी समेत गरेको थियो । घरेलु भुमिमा आयोजना भएको १३औं दक्षिण एसियाली खेलकुदमा नेपालले स्वर्णपदक जित्दा नेपाली यु–२३ को कप्तानी सुजल श्रेष्ठले गरेको थियो ।