धनगढी (हाम्रो खेलकुद) – मोफसलकै सर्वाधिक धनराशीको नेपाल आईस सुदूरपश्चिम अन्तर्राष्ट्रिय आमन्त्रण सुदुरपश्चिम खप्तड गोल्डकपको फाइनलको पहिलो हाफमा आयोजक सुदूरपशिचम–११ ले रुस्लान थ्री स्टारविरुद्ध अग्रता बनाएको छ ।

धनगढी रंगशालामा मंगलबार भएको फाइनलको पहिलो हाफमा घरेलु टोलीका विक्रम सिंह ठकुरीले गोल गर्दै थ्री स्टारविरुद्ध अग्रता दिलाउन सफल भएको हो । खेलको २८औं मिनेटमा फ्रिकिकमा विक्रमकै हेडरलाई अनन्त तामाङले ब्याक हेडर पासमा विक्रमसिंहले गोल गर्न सफल भएका हुन् । उनको प्रहारलाई थ्री स्टारका गोलरक्षक पुर्ण चेम्जोङले रोक्ने कुनै मौका पाएनन् ।

त्यसअघि खेलको २२औं मिनेटमा विक्रमसिंह ठकुरीकोको प्रहारलाई थ्र्री स्टारका कप्तान विक्रम लामाले हेडमार्फत गोललाइनबाट क्लियर गरेका थिए । थ्री स्टारले बल पोजेसन राखेपनि आयोजकविरुद्ध गोल गर्न सकेका छैनन् । ४३औं मिनेटमा सुशिल राईको हेडरलाई सुदूरपश्चिमा गोलरक्षक सुजित विसीले बचाउदा थ्री स्टार बराबरीबाट चुक्यो ।

दोस्रो हाफ केही बेरमा सुरु हुनेछ । प्रतियोगिताको विजेताले २१ लाख १ रुपैया पाउनेछ । उपविजेताले १० लाख १ रुपैँया पाउने आयोजकले जनाएको छ । यस्तै प्रतियोगिताको सर्वोकृष्ट खेलाडीलाई बेनेली मोटरसाईकल प्रदान गरिनेछ । यस्तै विभिन्न विधाका उत्कृष्ट खेलाडीलाई १५–१५ हजार प्रदान गरिने छ ।