धनगढी (हाम्रो खेलकुद) – ‘ए’ डिभिजनको रुस्लान थ्री स्टार क्लबलाई पराजित गर्दै आयोजक सुदूरपश्चि–११ स्पोर्ट्स क्लब मोफसलकै सर्वाधिक धनराशीको नेपाल आईस सुदूरपश्चिम अन्तर्राष्ट्रिय आमन्त्रण सुदुरपश्चिम खप्तड गोल्डकपको च्याम्पियन बनेको छ ।

धनगढी रंगशालामा मंगलबार भएको फाइनलमा थ्री स्टारलाई १–० ले पराजित गर्दै आयोजक पहिलोपटक च्याम्पियन बन्न सफल भएको हो । क्लब फुटबलमा सुदूरपश्चिमको यो सबैभन्दा ठुलो सफलता हो ।

आयोजकलाई च्याम्पियन बनाउन बिक्रम सिंह ठकुृरीले गरेको गोल नै निर्णायक बन्यो । थ्री स्टार भने लगातार दोस्रोपटक उपविजेतामा सीमित बन्न पुग्यो । खेलमा घरेलु टोलीलाई दवावमा राखेपनि थ्री स्टार फिनिसिङमा चुक्दा उपविजेतामा सीमति बन्न पुग्यो ।

थ्री स्टार अघिल्लो साता झापमा आयोजना भएको सताक्षी गोल्डकपमा पनि सान मिगेल मछिन्द्र क्लबसँग १–० ले पराजित हुदै उपविजेता नै बनेको थियो ।

खेलको २८औं मिनेटमा फ्रिकिकमा विक्रमकै हेडरलाई अनन्त तामाङले ब्याक हेडर पासमा विक्रमसिंहले गोल गर्न सफल भएका हुन् । उनको प्रहारलाई थ्री स्टारका गोलरक्षक पुर्ण चेम्जोङले रोक्ने कुनै मौका पाएनन् ।

त्यसअघि खेलको २२औं मिनेटमा विक्रमसिंह ठकुरीकोको प्रहारलाई थ्र्री स्टारका कप्तान विक्रम लामाले हेडमार्फत गोललाइनबाट क्लियर गरेका थिए । ४३औं मिनेटमा सुशिल राईको हेडरलाई सुदूरपश्चिमा गोलरक्षक सुजित विसीले बचाउदा थ्री स्टार बराबरीबाट चुक्यो ।

६१औं मिनेटमा अनन्त तामाङको प्रहारलाई सुदूरपश्चिमका गोलरक्षक सुजित विसीले मुस्किलले बचाए । ८०औं मिनेटमा मिक्छेन तामाङको प्रहारलाई सब्सिच्युट गोलरक्षक प्रितम खड्काले पञ्च गर्दै सम्भावित बराबरी टारे ।

इन्ज्युरी समयमा विक्रम सिंह ठकुरीले काउन्टर एट्याकमा वान भर्सेस वानमा गोल गर्न चुके । उनको प्रहारलाई थ्री स्टारका गोलरक्षक पुर्ण चेम्जोङले ब्लक गरे । त्यसपछि थप गोल निस्कन नसक्दा थ्री स्टार पराजित हुन पुग्यो ।

यससँगै सुदूरपश्चिमले २१ लाख १ रुपैया प्राप्त गरेको छ । थ्री स्टारले १० लाख १ रुपैयमा चित्त बुझाएको छ ।