एजेन्सी – फ्रेन्च युवा फरवाडै केलियन एमबाप्पेको ह्याट्रिक सहयोगमा पेरिस सेन्ट जर्मन (पीएसजी) सानदार जित सहित फ्रेन्च कपको फाइनलमा प्रवेश गरेको छ ।  बुधबार राति भएको खेलमा पीएसजीले लियोनलाई ५–१ ले पराजित गर्दै उपाधिनजिक पुगेको हो ।

पीएसजीको फराकिलो जितमा एमबाप्पेले ह्याट्रिक पुरा गर्दा ब्राजिली स्टार नेयमार र पाब्लो सारावियाले पनि समान १ गोल गरे । घरेलु टोलीका मार्टिन टेररले एक गोल गरे ।

खेलको ११औं मिनेटमा मार्टिनको गोलबाट लियोनले अग्रता बनाएको थियो । उनले कार्ल टोको इकम्वीको पासमा गोल गर्न सफल भएका थिए । तर, लियोनको त्यो अग्रता लामो समय टिकेन । १४औं मिनेटमा एमबाप्पेले बराबरी गोल फर्काए । उनले लेभिन कुर्जावाको पासमा गोल गर्न सफल भएका थिए ।

६४औं मिनेटमा लियोन १० खेलाडीमा समेटिएपछि पीएसजीले त्यसको पुरै फाइदा निकाल्न सफल भयो । लियोनका फर्नान्डो मार्कलले पेनाल्टी बक्समा ह्यान्ड गरेपछि दोहोरो पहेँलो कार्ड खादै मैदानबाट बाहिरिएका थिए ।

त्यसमा प्राप्त पेनाल्टीमा नेयमारले गोल गर्दै पीएसजीलाई खेलमा २–१ को अग्रता दिलाए । ७०औं मिनेटमा एमबाप्पेले व्यक्तिगत दोस्रो तथा टोलीका लागि तेस्रो गोल गरेपछि पीएसजीले खेलमा ३–१ को अग्रता बनायो ।

८१औं मिनेटमा पाब्लो सारावियाले गोल गर्दै पीएसजीलाई फराकिलो जिततर्फ अघि बढाए । इन्ज्युरी समयको थप गरिएको दोस्रो मिनेटमा ७० यार्डबाट एक्लै बलि अघि बढाउदै एमबाप्पेले सोलो गोल गर्दै ह्याट्रिक पुरा गर्दै पीएसजीलाई फाइनलको यात्रामा डोर्‍याए ।

अब पीएसजीले उपाधिका लागि सेन्ट इटिने र रेनिसबीचको विजेतासँग २६ अप्रिलमा खेल्नेछ । यि दुई टोलीबीच आज सेमिफाइनल खेल हुदैछ ।