दिपक बोहोरा, इलाम

आयोजक माइभ्याली फुटबल क्लब इलाममा जारी छैटौँ संस्करणको माईभ्याली गोल्डकपमा त्रिभुवन आर्मी लाई सडनडेथमा ५– ४ गोलले हराउँदै फाइनलमा प्रवेश गरेको छ । फाइनलमा आयोजकले उपाधिका लागि ए डिभिजन लिग विजेता मछिन्द्र क्लबसँग शनिबार प्रतिस्पर्धा गर्नेछ । आयोजक पहिलो पटक फाइनल प्रवेश गरेको हो ।

बिहिबार ठुलो टुडिखेलमा भएको सेमिफाइनलको निर्धारीत ९० मिनेट समय १-१ को बराबरीमा सकिएको थियो । अतिरिक्त समयमा पनि बराबरीमा सकिएपछि खेल टाइब्रेकरमा गएको थियो । टाइब्रेकरमा आयोजक टिमका देव लिम्बु, एन्ड्रो थियर यिबाक, लिला क्षेत्री, पासाङ शेर्पाले गोल गर्दा शरण बस्नेतको प्रहार आर्मीका गोलरक्षक विवश चौधरीले बचाएका थिए । विशाल तामाङको प्रहार बाहिरिएको थियो ।

यता आर्मीको तर्फबाट दिपक गुरुङ, दिप लामा, राजीव गुरुङ र राजु आलेको प्रहार गोल हुँदा सन्तोष तामाङ, इश्वरी बानिया र भरत चौधरीको प्रहार गोल हुन सकेन । खेलको अतिरिक्त समयमा आर्मीका विवेक बस्नेतले दोहोरो पहेलो कार्ड खादै बाहिरिए पछि आर्मी १० खेलाडीमा सिमित भएको थियो ।

त्यसअघि खेलको ३३ औं मिनेटमा आर्मीका गोलरक्षक विवश बल नियन्त्रणको लागि अगाडी बढेका अवस्थामा माइभ्यालीका करण राइले गोल गर्दै आयोजकलाई अग्रता दिलाएका थिए । ४१ अ‍ैं मिनेटमा आर्मीका सन्तोष तामाङले बराबरी गोल गरे । डि एरिया नजिक आयोजकका खेलाडीले आर्मीलाई फाउल गरे पछि पाएको फ्रि किकमा सन्तोषले गरेको प्रहार गोल भएको थियो । १७ औं मिनेटमा आर्मीका किपर बिट भइसकेको अवस्थामा आयोजकका विकास तामाङले गोल गर्न चुके । १८ मिनेटमा आर्मीका विवशले उत्कृष्ट पन्च गर्दै गोल बचाए ।

खेलमा तालमेल नमिल्दा पराजित हसन परेको आर्मीका प्रशिक्षक नविननयौपानेले बताए । भाग्यले साथ दिँदा  ऐतिहासिक सफलता प्राप्त गरेको आयोजक टिमका प्रशिक्षक दर्शन भक्तराजले बताए ।

माइभ्यालिका गोल रक्षक देब लिम्बु म्यान अफ दि म्याच बने । उनले नगर १५ हजार प्राप्त गरे ।  लिग च्याम्पियन मछिन्द्रसहित ए डिभिजनका ३ क्लब त्रिभुवन आर्मी क्लब, संकटाको सहभागिता रहेको प्रतियोगितामा १० टोलीको सहभागिता रहेको छ । फागुन २४ गते सम्म चल्ने गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।