दिपक बोहोरा, इलाम

माइभ्याली कपको छैटौं संस्करणको उपाधिको लागि शनिबार फाइनल खेल हुँदैछ । आयोजक माइभ्याली फुटबल क्लब र ए डिभिजन लिग विजेता मछिन्द्र क्लब फाइनलका लागि तयार रहेको दुवै टोलीका प्रशिक्षकले बताएका छन् ।

शुक्रबार फाइनलको अघिल्लो दिन भएको प्रि म्याच कन्फरेसनमा बोल्दै दुवै टिमका प्रशिक्षकले उपाधिको लागी तयार भएको बताएका हुन् । उपाधिको लागि शनिबार ३ बजे इलाम स्थित ठुलो टुडिखेलमा यि दुई टिम बिच प्रतिस्पर्धा हुनेछ । शनिबार हुने छैटौं संस्करणको फाइनलमा लिग विजेता मछिन्द्रले आयोजक टिम माइभ्यालि फुटबल क्लब संग प्रतिस्पर्धा गर्नेछ ।

आयोजक र मछिन्द्र दुवै टिमले पहिलो पटक फाइनल खेल्न लागेका हुन् । मछिन्द्र सेमिफाइनलमा मानेभञ्जाङ फुटबल क्लबलाई हराउँदै फाइनल प्रवेश गरेको थियो । यता आयोजकले त्रिभुवन आर्मीलाई सडनडेथमा हराउँदै फाइनल प्रवेश गरेको हो । शनिबार हुने खेलमा मछिन्द्र घरेलु दर्शक र घरेलु मैदानको दबाब हुनेछ ।

यता आयोजक टिमले स्टार खेलाडी हेभिवेट टोलीको दबाब महसुस गर्न सक्नेछ । छैटौं संस्करणसम्म आइपुग्दा यी दुवै टिमले उपाधि जित्न सकेका छैनन् । छैटौं संस्करणको माइभ्यालि गोल्डकपले नयाँ च्याम्पियन पाउनेछ । दुवै टोली शनिबार माइभ्यालि गोल्डकपको नयाँ च्याम्पियन टिम बन्ने लक्ष्यसहित दुबै टिम मैदान उत्रने छन् ।

फाइनल अघि शुक्रबार आयोजना भएको प्रि म्याच कन्फरेन्समा दुवै टिमले उपाधि हात पार्ने दाबी गरेका छन् । सहिद स्मारक ‘ए’ डिभिजन लिगमा लिग जितेको मछिन्द्र क्लब संग स्टार खेलाडीहरु रहेको छन् । यता आयोजकले विभिन्न क्लबका खेलाडीहरु मिश्रणमा टिम निर्माण गरेको छ । जावलाखेलका विशाल तामाङ, फ्रेन्डस क्लबका देव लिम्बु र ब्रिगेड ब्वाइजको शिशिर लेखि लगायतको खेलाडीहरु समेटेर टिम निर्माण गरेको आयोजक मछिन्द्रलाई हराउँदै पहिलो पटक उपाधि जित्ने दाउमा रहेको छ । विदेशी खेलाडीहरुको भरमा खेल जित्ने लक्ष्यमा रहेको आयोजकलाई स्टार खेलाडीहरुले भरिएको मछिन्द्रलाई हराउन त्यति सहज भने छैन् ।

‘फाइनल खेल आफैंमा दवाव हुन्छ । त्यहि माथि घरेलु टिमलाई हराउन उति सजिलो हुँदैन, ‘मछिन्द्रका प्रशिक्षक प्रबेश कटुवालले भने, ‘फाइनल खेल ५०–५० को हो । हामीसँग राम्रो टिम भएकाले टिमवर्क मिलेमा खेल जित्नेछौं । हाम्रो तर्फबाट एकदमै मेहनत गर्नेछौं ।’

घरेलु दर्शक र घरेलु मैदानका कारण कुनै दबाब नभएको आयोजक टिमका प्रशिक्षक दर्शन राजभक्त बताउँछन् । ‘घरेलु मैदानको फाइदा उठाउँदै उपाधि जित्ने लक्ष्य छ । विभिन्न ए डिभिजनका क्लबको अनुभव बटुलिसकेका खेलाडीहरु समेटदै टिम निर्माण गरेका छौं । घरेलु मैदानमा हामी उपाधि जित्न सक्षम छौं, ‘ उनले बताए ।

लिग च्याम्पियन मछिन्द्रसहित ए डिभिजनका ३ क्लब त्रिभुवन आर्मी क्लब, संकटाको सहभागिता रहेको प्रतियोगितामा कुल १० टोलीको सहभागिता रहेको थियो । गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।