पोखरा (हाम्रो खेलकुद) – विभागीय टोली नेपाल एपिएफ क्लबलाई पराजित गर्दै रमपम झापा-११ फुटबल क्लब पोखरामा जारी आहा रारा गोल्डकपको क्वाटरफाइनलमा प्रवेश गरेको छ । झापा-११ ले टाइब्रेकरमा ५-३ को जित दर्ता गरेको हो ।

शुक्रबार पोखरा रंगशालामा निर्धारित ९० मिनेटको खेल गोलरहित बराबरीमा सकिएपछि खेल अतिरिक्त समयतर्फ धकेलिएको थियो । अतिरिक्त समयमा दुवै टोलीले १-१ गोल गरेपछि खेल टाइब्रेकरमा धकेलिएको थियो ।

टाइब्रेकरमा झापाका गोलरक्षक राजकुमार लिम्बुले एपीएफका सुदिप शिख्राकारको पेनाल्टी बचाए । झापाको लागी हेमन्त थापामगर, मौसम लिम्बु, प्रमोद चौधरी, विशाल दर्जी र कप्तान संजित राइले गोल गरे भने एपीएफका लागी नविन लामा ,राजिव लोप्चन र गोलरक्षक राजु नगरकोटीले गोल गरे । झापाका गोलरक्षक राजकुमार खेलको म्यान अफ द म्याच घोषित भए ।

झापाका लागि अतिरिक्त समयको दोस्रो हाफमा सुनिल खड्काले गोल गरे । उनले २१ औं मिनेटमा गरेको भली प्रहारलाई एपिएफका गोलरक्षक राजु नगरकोटीले बचाउन सकेनन् । सुनिलले अभिषेक गुरुङको क्रसलाई पहिलो टचमा नै पेनाल्टी क्षेत्रभित्र गोलमा परिणत गरे ।

अतिरिक्त समयको अन्तिम मिनेटमा एपिएफले बराबरी गोल फर्कायो । प्रविन स्याङतानको क्रसमा आकाश बुढामगरको हेडर क्रसबारमा लाग्दै मैदानमा फर्कंदा झापाका गोलरक्षक राजकुमार लिम्बुले बचाउन खोज्दा गोलमा परिणत भयो ।

त्यसअघि खेलको १३ औ मिनेटमा एपिएफका आकाश बुढा मगरले पोस्ट नजिकै बाट गरेको प्रहार फस्ट बार नजिकैबाट बाहिरीयो । २१ औं मिनेटमा एपिएफका नविन लामाले झापाका गोलरक्षक राजकुमार लिम्बु अगाडि बढ्ने क्रममा फ्लिक गरेको बल क्रसबार माथी बाट बाहिरियो ।

त्यस्तै खेलको ३१ औ मिनेटमा झापा ११ का अभिषेक गुरुङले दिएको क्रसपासमा सरोज कार्कीको प्रहार क्रसबार माथीबाट बाहिरीयो । खेलको ४४ औं मिनेटमा एपिएफका प्रदिप लामाले गरेको लामो प्रहारलाइ झापाका गोलरक्षक राजकुमारले पन्च गर्दै जोगाए ।

खेलको ५४ औं मिनेटमा एपिएफका नविन लामा गोल गर्नबाट चुके । गोलरक्षक राजकुमार लिम्बुले विकु तामाङलाई पेनाल्टी क्षेत्रभित्र तानेपछि एपिएफले पेनाल्टिको अवसर पाएको थियो । नविनले सेकेन्डबार च्याप्दै गरेको प्रहार गोलरक्षक राजकुमारले उत्कृष्ट बचाउ गरे ।

खेलको ६० औं मिनेटमा एपिएफका प्रविन स्याङतान एपीएफकाका गोलरक्षकलाइ बिट गर्दै गरेको प्लेसिङमा झापाका डिफेन्डर सन्जित राइ बाधक बने । ७४ औ मिनेटमा एपीएफका राजिव लोपचनले २ डिफेन्सलाइ बिट गर्दै गरेको प्रहारलाई झापाका गोलरक्षकले उत्कृष्ट डाइभ गर्दै बचाउ गरे । निकै आक्रमक खेल खेलेको एपिएफको आक्रमणको अगाडि गोलरक्षक राजकुमार बाधक बनिरहे ।

प्रतियोगिता अन्तर्गत झापाले २५ फागुनमा नेपाल आयल निगम मनाङ मर्स्याङ्दी क्लबको सामना गर्नेछ । शनिबार नेपाल पुलिस क्लबले आयोजक सहारा क्लबको सामना गर्नेछ ।