पोखरा (हाम्रो खेलकुद)– विभागीय टोली नेपाल पुलिस क्लबले आहा रारा गोल्डकपको क्वाटरफाइनलमा आयोजक सहारा क्लबलाई टाइब्रेकर ४-२ ले पराजित गरेको छ । यस जितसँगै पुलिस अन्तिम चारमा प्रवेश गरेको हो ।

पोखरा रंगशालामा शनिबार निर्धारित समयको खेल १-१ को बराबरीमा सकिएपछि खेल अतिरिक्त समयमा पुगेको थियो । अतिरिक्त समयमा थप गोल नहुँदा टाइब्रेकरमा खेल निर्धारण भयो । टाइब्रेकरमा पुलिसका लागि भारत साह, सौजन याक्खा राई, हेम तामाङ र सुमन सुवेदीले गोल गरे । पुलिसका अनुप लिम्बूको प्रहारलाई सहाराका गोलरक्षक अर्पण कार्कीले बचाए । सहाराका लागि पहिलो प्रहार नै सफल भएन । उलरीच सिवेको प्रहार पुलिसका रोशन खड्काले विफल पारे । सहाराका आशिष गुरुङ र अजय श्रेष्ठले गोल गर्दा त्रिदेव गुरुङको प्रहार भने बाहिरियो ।

त्यसअघि खेलको ७५ औं मिनेटमा पुलिसले भारत साहको गोलमा अग्रता लिएको थियो । तर सहाराले इन्ज्युरी समयको चौथो मिनेटमा गोल गर्दै खेल अतिरिक्त समयमा लम्ब्यायो । सहाराका लागि वैकल्पिक अजय श्रेष्ठले गोल गरेका थिए । थप गरिएको ३० मिनेटमा दुवै टोलीबाट गोल हुन सकेन । यद्दपी अतिरिक्त समयको अन्तिम समयमा भोला सिलवालले रातो कार्ड पाएपछि पुलिस १० खेलाडीमा सिमित भयो ।

खेलको आठौं मिनेटमा पुलिसका निरकुमार राइको फ्रीकिकलाइ उत्कृष्ट बचाउ गर्दा सहाराका गोलरक्षक अर्पण केहि घाइते देखिएका थिए । खेलको २४ औं मिनेटमा सहाराका अनिष पोमु लिम्बुको हेडर क्रसबार नजिकैबाट बाहिरियो । खेलको ३९ औं मिनेटमा पुलिसका निरकुमार राइको प्रहार क्रसबारमा लाग्दै फर्कीयो ।

शारीरिक रुपमा बलियो देखिएको पुलिसले सहारालाइ केहि दबाबमा राखे पनि गोल गर्न भने सकेन । खेलको ६४ औं मिनेटमा सहाराका सुमित श्रेष्ठको उत्कृष्ट प्रहार सेकेन्डबारमा लाग्दै फर्कंदा सहारा अग्रता लिनबाट चुक्यो । पुलिसका गोलरक्षक रोशन खड्काले नभेटेको बल सेकेन्डबारमा लाग्दै खड्काको हातमा आएको थियो ।

ए डिभिजन टोली ब्रिगेड ब्वाइज क्लब (बिबिसी) लाई हराउँदै आयोजक टोली अन्तिम आठमा पुगेको थियो । पुलिसले भने बाई पाएर सिधै क्वाटरफाइनल खेलेको हो । प्रतियोगिताको सेमिफाइनलमा अब पुलिसले रुस्लान थ्री स्टार र भारतीय टोली गान्तोक फुटबल क्लबको विजेतासँग खेल्नेछ । आइतबार हुने दोस्रो क्वाटरफाइनलमा नेपाल आयल निगम मनाङ मर्स्याङ्दीले झापा-११ फुटबल क्लबको सामना गर्नेछ ।