पोखरा (हाम्रो खेलकुद) – मनाङ मर्स्याङ्दी क्लबले आहा रारा गोल्डकपको दोस्रो सेमिफाइनलमा त्रिभुवन आर्मी क्लबलाई पराजित गरेको छ । पोखरा रंगशालामा मनाङ ३-२ ले विजयी हुँदै पुलिससँग उपाधि भिडन्त पक्का गरेको हो ।

खेलको चौथो मिनेटमा फ्लोरेन्टले गोल गर्दै मनाङ-मर्स्याङ्दीलाई अग्रता दिलाए । सुशिल लामाको कर्नरमा विमल रानाको हेडरलाई अन्जन विष्टले मिलाईदिएको पासमा फ्लोरेन्टले वान टचमा गोल गर्न सफल भएका थिए । १८औं मिनेटमा मनाङका अन्जन विष्टले एकल प्रयासमा गरेको प्रहार सदुपयोग हुन सकेन ।

१९औं मिनेटमा आर्मीका कप्तान भरत खवासको प्रहारलाई मनाङका गोलरक्षक सोजित गुरुङले नियन्त्रणमा लिए । २२औं मिनेटमा सन्तोष तामाङको फ्रिकिकमा जर्जप्रिन्स कार्कीको प्रहार आकासियो । २४औं मिनेटमा दयानन्द सिंहले वान भर्सेस वानकै अवस्थामा गरेको प्रहार फितलो बन्दा मनाङ अग्रता दोब्बर पार्नबाट चुक्यो ।

२९औं मिनेटमा बिमल रानाले गोल गर्दै मनाङको अग्रता दोब्बर पारे । अन्जन विष्टको पासमा अनमार्क रहेका विमलले दोस्रो बार च्याप्दै गरेको प्रहार आर्मीका गोलरक्षक विवश चौधरीले रोक्ने कुनै मौका नै पाएनन् ।

आर्मीले खेलको ४२ औं मिनेटमा गोल गर्दै खेलमा फर्कियो । सुमन अर्यालको क्रसमा नवयुग श्रेष्ठले दिएको हेडर पासमा कप्तान भरतले ६ यार्ड बक्स भित्रबाट नै हेडरमा गोल गरे ।

५९अौं मिनेटमा बिमल रानाको क्रस पासमा पेनाल्टी बक्समा अनमार्क रहेका अन्जन बिष्टको हेडर आर्मीका गोलरक्षक विवश चौधरीले सहजै नियन्त्रणमा लिए । ६९अौं मिनेटमा जर्जप्रिन्स कार्कीको हेडर क्रसबारबाट बाहिरिदा आर्मीले खेल बराबरी गर्नबाट चुक्यो । बिबेक बस्नेतको क्रसमा भरत खवासले मिलाई दिएको हेडर पासलाई जर्जले सदुपयोग गर्न सकेन ।

७४अौं मिनेटमा नवयुग श्रेष्ठको प्रहारलाई मनाङका गोलरक्षक सोजित गुरुङले मुस्किलले पञ्च गर्दै बचाए । लगत्तै कर्नरमा आएको बलमा सोजित नै बाधक बन्दा आर्मी बराबरीबाट चुक्यो । ८१अौं मिनेटमा अन्जन बिष्टले गोल गर्दै मनाङलाई ३-१ को अग्रता दिलाए । आर्मीका बिकास तामाङको गल्तिमा काउन्टर अट्याकमा बिमलले मिलाई दिएको पासमा अन्जनले वान भर्सेस वानकै अवस्थामा बिट गर्दै गोल गर्न सफल भएका थिए ।

८३अौं सब्सिच्युट खेलाडी टंक बस्नेतको क्रसमा दिप लामाले गोल गर्दै खेललाई ३-२ को अवस्थामा ल्याए । थप प्रयासमा गोल गर्न नसकेपछि मनाङ फाइनलमा प्रवेश गरेको हो । फाइनल शनिबार हुनेछ । उपाधि विजेताले १० लाख र उपविजेताले ५ लाख प्राप्त गर्नेछन् ।