काठमाडौं (हाम्रो खेलकुद)– ए डिभिजन टोली प्रभु बैंक जावलाखेल युथ क्लब चौथो राजर्षी जनक कप फुटबल प्रतियोगिताको सेमिफाइनलमा पुगेको छ । सर्लाहीको बागमतीमा बिहीबार भएको अन्तिम क्वार्टरफाइनलमा भारत दार्जिलिङको यूकेएफसीलाई २–० ले हराउँदै जावलाखेल अन्तिम चारमा पुगेको छ । अब जावलाखेलले भारत सिलगुढीको कन्चनजंगा एफसीको सामना गर्नेछ ।

जवलाखेललाई बिहीबार जित दिलाउन रुपबहादुर लामा र फोडे फोफोनाले गोल गरेका थिए । रुपबहादुरले १४ औं मिनेटमा गोल गरे भने फोफानाले ६८ औं मिनेटमा टोलीका लागि दोस्रो गोल गरे । म्यान अफ दी म्याच बनेका रुपबहादुरले १० हजार रुपैयाँ प्राप्त गरे ।

बागमती नगरपालिका र बागमती युवा क्लबको संयुक्त आयोजनामा जारी प्रतियोगितामा शुक्रबार हुने पहिलो सेमिफाइनलमा साविक विजेता सुदूरपश्चिम ११ स्पोर्टस क्लबले अर्को ए डिभिजन टोली नेपाल पुलिस क्लबको सामना गर्नेछ । राजर्षीको विजेताले १० लाख रुपैयाँ प्राप्त गर्नेछ ।

पुलिसको अर्को टोलीले शनिबार पोखरामा आहा रारा गोल्डकप फुटबल प्रतियोगिताको उपाधिका लागि नेपाल आयल निगम मनाङ मस्र्याङ्दी क्लबको सामना गर्नेछ ।

अर्को विभागिय टोली त्रिभुवन आर्मी क्लबलाई बिहीबार ३–२ हराउँदै मनाङले अन्तिम दुईको यात्रा तय गरेको थियो । अघिल्लो दिन रुस्लान थ्री स्टार क्लबलाई २–० ले हराउँदै पुलिसले आहा रारा गोल्डकपको फाइनल यात्रा तय गरेको थियो ।