काठमाडौं (हाम्रो खेलकुद)– एकै समय दुई वटा नकआउट फुटबल प्रतियोगितामा भाग लिइरहेको नेपाल पुलिस क्लब सर्लाही बागमतीमा जारी राजर्षी जनक कप फुटबल प्रतियोगिताको फाइनलमा पुगेको छ । साविक विजेता सुदूरपश्चिम ११ स्पोर्टस क्लबलाई ३–१ ले हराउँदै पुलिस अन्तिम दुईमा पुगेको हो ।

पुलिसको अर्को टोली १८ औं आहा रारा गोल्ड कप फुटबल प्रतियोगिताको फाइनलमा पुगेको छ । पोखरामा शनिबार हुने फाइनलमा पुलिसले नेपाल आयल निगम मनाङ मस्र्याङ्दी क्लबको सामना गर्दैछ । यसअघि पुलिसले एकैपटक तीन वटा बुढासुब्बा गोल्डकप, नेपाल आइस खप्तड सुदूरपश्चिम गोल्डकप र राइनो कपमा एकै साथ प्रतिस्पर्धा गरेको थियो ।

बागमतीमा जारी राजर्षीमा भने पुलिसले प्रभु बैंक जावलाखेल युथ क्लब तथा भारत सिलगुढीको केएफसीमध्ये एक टोलीको सामना गर्नेछ । यी दुई टालीबीच शनिबार खेल हुनेछ । सन्तोष स्मृति मैदानमा शुक्रबार भएको सेमिफाइनलमा कप्तान जुमानु राईको महत्वपूर्ण भूमिकामा पुलिसले फाइनल यात्रा तय गरेको थियो । जुमानुले ४८ औं मिनेटमा गोल गरे ।

त्यसपछि तीर्थ रानाले २ गोल थपे । उनले ५६ औं र ६८ औं मिनेटमा गोल गरेका थिए । तीर्थको पहिलो गोलमा जुमानु र दोस्रो गोलमा रविन श्रेष्ठको पास थियो । खेलको म्यान अफ दी म्यान बनेका जुमानुले १० हजार रुपैयाँ प्राप्त गरे । बागमती नगरपालिका र बागमती युवा क्लबले संयुक्त रुपमा आयोजना गरेको राजर्षीको विजेताले १० लाख रुपैयाँ प्राप्त गर्नेछ ।