एजेन्सी – विश्व फुटबल इतिहासमा नै स्पेनिस क्लब रियल म्याड्रिडको जर्सी नम्बर ७ को चर्चा हुने गरेको छ । रियलका लागि महान खेलाडीले यो जर्सी प्रयोग गरेका छन् ।

पछिल्लो दशक रियलको जर्सी नम्बर ७ मा सुपरस्टार क्रिस्टियानो रोनाल्डो देखिए । सीआर७ को नामले नै प्रख्यात रोनाल्डोले त्यसअघि म्यानचेस्टर युनाइटेडमा पनि उक्त जर्सी नै प्रयोग गरेका थिए । तर रोनाल्डो रियल म्याड्रिडमा आउँदा तत्कालिन कप्तान राउलले ७ नम्बर जर्सी लगाएका कारण रोनाल्डोले ९ नम्बर लगाएका थिए ।

रियलका लागि रोनाल्डो र राउलसँगै अन्य महान खेलाडीले पनि यो जर्सी प्रयोग गरेका छन् । गोलले सन् १९४० देखि हालसम्म रियल म्याड्रिडको जर्सी नम्बर ७ प्रयोग गर्ने खेलाडीको इतिहास अध्ययन गरेको छ ।

सुरुवाती दिन : कोपा, आमान्सियो, जुआनिटो

रियल म्याड्रिडको नाम विश्व फुटबल इतिहासमा थुप्रै पन्नामा भेटिन्छ । सन् १९४७ नोभेम्बर २३ मा रियल म्याड्रिड र एटलेटिको म्याड्रिडबीचको खेलमा पहिलो पटक जर्सी नम्बर अंकित गरिएको थियो । सुरुवाती समयमा जर्सी नम्बर खेलमा रहेको पोजिसनको आधारमा तोकिन्थ्यो । पहिलो रोजाइमा पर्ने खेलाडीले १ देखि ११ नम्बरसम्म जर्सी लगाउँथे ।

रियलमा सबैभन्दा पहिला फरवार्ड साबिनो बरिनागाले जर्सी नम्बर ७ प्रयोग गरे । त्यसपछि मिडफिल्डर जोसे मारिया जार्रागाले पनि यो जर्सी लगाए । तर जर्सी नम्बर ७ लगाएर क्लबका लागि उल्लेखनीय योगदान दिने पहिलो खेलाडी रेमन्ड कोपा थिए ।

फ्रान्स र स्पेनिस फुटबलका दिग्गज खेलाडी कोपाले आफ्नो करीअरको अधिकांश समय फ्रान्समै बिताए । उनले रेइम्सबाट खेल्दै आफ्नो करीअरलाई उचाई दिए । रियल म्याड्रिडमा सन् १९५६ देखि १९५९ सम्म खेल्दै उनले स्पेनिस फुटबलमा पनि आफ्नो छाप छोडे ।

कोपाले त्यसबेला अल्फ्रेडो डी स्टेफानो र फेरेन्च पुस्काससँग खेल्दै रियलमा सफल समय बिताए । त्यसबेला उनले दुई पटक लिग उपाधि र ३ ओटा युरोपेली कप जिते । अन्तिम उपाधि जित्दा रियलले रेइम्सलाई पराजित गरेको थियो । कोपा त्यस सिजनपछि पुन: रेइम्स नै फर्किए ।

कोपाको प्रस्थानपछि जर्सी नम्बर ७ अन्य खेलाडीले प्रयोग गरे । तर कसैले पनि त्यसमा प्रभाव जमाउन सकेनन् । सम १९६३ मा अमान्सियोले रियल आएपछि जर्सी नम्बर ७ रोजे । डेपोरटिभो ला कोरुनाबाट आएका राइट विंगर उनले रियलमा १३ वर्ष खेले ।

यसक्रममा उनले ९ ओटा लिग उपाधि जिते । दुई पटक लिगको सर्वाधिक गोलकर्ता बनेका उनी सन् १९६८ मा फिफाको विश्व ११ मा पनि पर्न सफल भए । ‘द विजर्ड’ अर्थात् जादुगरका नामले परिचित अमान्सियोले रियलका लागि १ सय ५५ गोल गरे । उनले खेलाडी जीवनबाट सन्न्यास लिएपछि क्लबको एकेडेमी र सिनियर टिममा प्रशिक्षकको भूमिका पनि निर्वाह गरे ।

अमान्सियोको सन्न्यासपछि जर्सी नम्बर ७ हेन्निङ हेन्सन हुँदै इटोसम्मले लगाए । त्यसपछि फरवार्ड जुआनिटोले उक्त जर्सी पहिरिए । सन् १९७७ मा बुर्गोसलाई दोस्रो श्रेणीबाट उकालेपछि उनी रियल म्याड्रिड आएका थिए । एटलेटिकोमा युवा खेलाडी रहँदा गम्भीर चोट बोकेका जुआनिटोको करीअर धरापमा रहेको आँकलन गरिएको थियो । तर इनले उत्कृष्ट पुनरागमन गरे ।

रियल म्याड्रिडबाट जुआनिटोले ३ सय ५० खेल खेल्दै ९९ गोल गरे । यसक्रममा उनले पाँच पटक लिग उपाधि र दुई पटक यूईएफए कप जिते । एक सिजन त उनी सर्वाधिक गोलकर्ता पनि भएका थिए । झन्डै एक दशक क्लबमा बिताएपछि उनले मालागालाई नयाँ गन्तव्य बनाए । उनको सन् १९९२ मा ३७ वर्षको उमेरमा सडक दुर्घटनामा मृत्यु भएको थियो ।

आधुनिक युग : बुट्रागेनो, राउल र रोनाल्डो

सन् १९८७ मा जुआनिटोले रियल म्याड्रिड छोड्ने बितिक्कै एमिलियो बुट्रागेनोले जर्सी नम्बर ७ लगाए । गोल गर्ने तीक्ष्ण नजरका कारण उनले ‘द भल्चर’ अर्थात् गिद्धको उपनाम पाएक थिए । रियलको युथ एकेडेमीमा हुर्केर दोस्रो टोली हुँदै सिनियर टोलीमा आएका उनले सन् १९८४ मा अल्फ्रेडो दि स्टेफानोको प्रशिक्षणमा डेब्यु गरेका थिए ।

डेब्यु खेलमा नै एमिलियोले गजबको प्रभाव छाडेका थिए । रियल २-० ले पछाडी भएको अवस्थामा मैदान छिरेका उनले २ गोल र एक असिस्ट प्रदान गर्दै टोलीलाई जित दिलाए । त्यसबेला केहि कमजोर देखिंदै गएको म्याड्रिडमा उनी आशाका किरणका रुपमा उदाए ।

१९८० को दशकको मध्यतिर एमिलियोले नै म्याड्रिडको आक्रमण सम्हाल्दै सफलता दिलाए । उनले क्लबको उपाधि कक्ष भर्दै गए र कुल १ सय २३ गोल पनि गरे । सन् १९९५ मा उनले म्याड्रिड छोड्दा जर्सी नम्बर ७ को महत्त्व निकै ठूलो भैसकेको थियो । राफेल मार्टिन भाज्केज, अल्फोन्सो, लुइस एन्रिके, जोसे आमाभिस्का र जान एसनाइडर सबैले यसको प्रयोग गरेपनि टिकाउन सकेनन् । त्यसपछि राउल गोन्जालेजले उक्त जर्सीलाई न्याय दिए ।

एमिलियोकै पथमा आएका राउल रियलको युथ एकेडेमीका खेलाडी थिए । राउलले रियलको जर्सीमा १६ वर्ष खेल्दै थुप्रै कीर्तिमान बनाए । रियल म्याड्रिड र स्पेनी राष्ट्रिय टोलीका लागि सर्वाधिक गोलकर्ता भए । च्याम्पियन्स लिगमा सर्वाधिक गोल गर्ने खेलाडी पनि बने । उनी ला लिगा र च्याम्पियन्स लिगमा दुई पटक सर्वाधिक गोलकर्ता बने । सन् २००१ को ब्यालोन डी’ओरमा दोस्रो भएका उनले क्लब र देश दुवैको कप्तानी गरे ।

राउलले सन् १९६० को दशकमा डी स्टेफानोले राखेको कीर्तिमान तोडेका थिए । राउलले आफ्नो रियल करीअरमा ३ सय २३ गोल गरे । आधुनिक युगका रियलका समर्थकले राउल करीअरको उत्तर्रार्द्धमा रहँदा खेल हेरेका कारण उनको महत्त्व केहि कम आँक्न सक्छन् । तर कमै खेलाडीले लामो समयसम्म राउलजसरि क्लबका लागि योगदान दिएका छन् । त्यसो त डी स्टेफानोको कीर्तिमान १९६४ देखि २००९ सम्म रहेकोमा राउलले तोडेका थिए । तर राउलको कीर्तिमान सन् २०१५ मै रोनाल्डोले तोडिदिए ।

रोनाल्डोले राउलसँग रहेर खेल्दा जर्सी नम्बर ९ प्रयोग गरे । राउलले क्लब छाडेर जर्मन क्लब साल्का गएसँगै रोनाल्डोले जर्सी नम्बर ७ पहिरिए र क्लबमा नयाँ इतिहास रचे । उनले आफ्नो रियल बसाईंमा ४ सय ५१ गोल गरे । यसक्रममा ४ च्याम्पियन्स लिग जित्ने अद्भुत उपलब्धि पनि उनले हासिल गरे । विश्व फुटबलले देखेको सबैभन्दा ठूलो प्रतिस्पर्धा, लिओनेल मेस्सी र रोनाल्डोको उत्कृष्टताको होड पनि आधुनिक युगले देख्यो ।

रियलको इतिहासमा डी स्टेफानोको प्रभाव कुनैपनि खेलाडीले तोड्ला या नातोडला भन्ने प्रश्न सधैं रहन्छ । तर यो पक्का छ की रोनाल्डो रियलको आधुनिक युगका सबैभन्दा ठूला खेलाडी रहे । रोनाल्डोले क्लब छाडेपछि मारियानो डियाजले उक्त जर्सी प्रयोग गरे । यसबारे जति कम सोच्यो, त्यति राम्रो हुन्छ ।

यस सिजन इडेन हाजार्डले जर्सी नम्बर ७ रोजे । चेल्सीबाट मोटो रकममा रियल आएका उनको पहिलो सिजन चोटले गर्दा अपेक्षित रुपमा अगाडी बढ्न सकेन । सुरुवाती युगका कोपादेखि आधुनिक नायक रोनाल्डोसम्म जति पनि जर्सी नम्बर ७ लगाए जमे, हाजार्डले त्यो सुचिमा आफूलाई उभ्याउन पक्कै सहज हुनेछैन ।