एजेन्सी – झन्डै ३ महिनाको अनपेक्षित विश्रामपछि क्याटलान क्लब बार्सिलोना र स्पेनिस महारथी रियल म्याड्रिड स्पेनिस ला लिगाको उपाधि भिडन्तमा फर्कंदै छन् ।

हाल लिगको अंक तालिकामा बार्सिलोना शीर्षस्थानमा रहेको छ । चिर परिचित प्रतिद्वन्द्वी रियल म्याड्रिडभन्दा २ अंकले अगाडी रहेको बार्सा लिगको अन्तिम खेलपछि पनि सोहि अवस्थामा रहन चाहन्छ । यता रियल भने पछिल्ला केहि खेलमा आएको खराब नतिजा बिर्साउँदै अग्रस्थानमा फर्कन प्रयासरत हुनेछ ।

यदि लिगको अन्तिम खेलपछि दुवै टोलीको अंक बराबरी भएमा रियल म्याड्रिडले उपाधि जित्नेछ । रियलले घरेलु मैदानमा हुन बाँकी खेल सान्टियागो बर्नाबाउमा नखेल्ने बताउँदै आफ्नो प्रशिक्षण मैदानलाई स्तरोन्नति गर्ने भएको छ । सँगसँगै बर्नाबाउमा पुनर्निर्माणको कार्यलाई पनि द्रुत गतिमा अगाडी बढाइनेछ । रियल र बार्सिलोनाभन्दा अन्य कुनै टोली उपाधि होडमा आउन भने कुनै आश्चर्यजनक नतिजा नै आउनुपर्नेछ ।

शीर्षस्थानको बार्सिलोनालाई सुआरेजको आगमनले फाइदा

बार्सिलोनाको लक्ष्य प्रष्ट छ, दुई अंकको अग्रतालाई सकेसम्म बढाउने नत्र भने कम्तिमा पनि यसलाई बचाउने । यस लक्ष्य प्राप्त गर्न प्रशिक्षक किके सेटिनलाई सहज भने पक्कै छैन । कोरोनाका कारण लिग स्थगित हुनुअघि पनि बार्साको प्रदर्शन सन्तोषजनक थिएन ।

कप्तान मेस्सीले सार्वजनिक रुपमा नै सेटिनको रणनीति बार्सिलोनाको स्तरको हिसाबले च्याम्पियन्स लिग जित्न पर्याप्त नरहेको बताएका थिए । मिडफिल्डर इभान राकिटिचले पनि बार्सिलोनाले आफ्नो प्रदर्शनमा सुधार गर्नु आवश्यक रहेको औंल्याएका छन् ।

कोरोनाको विश्रामले बार्सिलोनालाई केहि फाइदा पनि पुगेको छ । चोटका कारण मैदानबाहिर रहेका फरवार्ड लुइस सुआरेजले मैदान फर्कने अवसर पाएका छन् । साथसाथै स्टार फरवार्ड मेस्सीले पनि विश्राम पाएका छन् । अन्तिम ११ खेलका लागि दुवै मुख्य फरवार्डले आफ्नो शत प्रतिशत प्रदर्शन गर्दा बार्सिलोनालाई पक्कै फाइदा हुनेछ ।

शीर्षस्थानमा फर्कन तत्पर छ रियल म्याड्रिड

रियलको सामुन्ने लिग उपाधि जित्ने हो भने प्रष्ट योजना अगाडी छ, आफ्नो बाँकी रहेको ११ खेल जित्ने र लिग उपाधि पुन: आफ्नो पोल्टामा पार्ने । सबै खेल नजितेर पनि लिग उपाधि आफ्नो पक्षमा पार्न सकिन्छ भन्ने कसैलाई विश्वास छैन । ११ खेलमा जित दर्ता गर्न कठिन छ, तर असम्भव छैन ।

रियलले पछिल्लो पटक सन् २०१५/१६ मा लगातार ११ जित दर्ता गरेको थियो । त्यसबेला पनि प्रशिक्षक जिदान नै थिए । यसपटक जिदानलाई इडेन हाजार्ड र मार्को एसेन्सियो टोलीमा फर्कनुले थप उर्जा दिएको छ । टोलीको आक्रमणमा भरोसा गर्न सकिने खेलाडी आएसँगै डिफेन्सलाई पनु सुदृढ बनाउन जिदान तत्पर छन् ।

बार्सिलोनाका बाँकी खेल :

मालोर्का, लेगानेस, सेभिल्ला, एथ्लेटिक बिल्बाओ, सेल्टा भिगो, एटलेटिको म्याड्रिड, भिल्लारियल, एस्पान्योल, भालाडोलिड, ओसासुना, अलाभेस

रियलका बाँकी खेल :

एइबार, भ्यालेन्सिया, रियल सोसीडाड, मालोर्का, एस्पान्योल, गेटाफे, एथ्लेटिक बिल्बाओ, अलाभेस, ग्रानडा, भिल्लारियल, लेगानेस