दिपक बोहोरा, पाँचथर

सरकारले हरेक स्थानिय निकायमा एक खेल ग्रामको अवधारण अघि सारेको छ । सरकारले आफ्ना नीति तथा कार्यक्रमका दौरान त्यस्तो उद्घोष यसपटक पनि गरेको छ । त्यो भन्दा पनि अझै अग्रगामी घोषणा गर्ने क्रममा पाँचथरका ८ वटा स्थानिय निकायले एक वडा एक खेल मैदानको अवधारणा नीति तथा कार्यक्रममा समावेश गर्ने गरेका छन्।

तर पनि पाँचथरमा अहिले सम्म इलाभेन ए साइड (११ जना) फुटबल मैदान निर्माण हुन सकेका छैन। सदरमुकाम फिदिममा रहेको फिदिम उच्च माविको खेलमैदान पटक भत्किए पछि जिल्लामा आयोजना हुने नियमित प्रतियोगिताहरु स्थगित भएका छन् ।

दुई वर्ष अगाडि नयाँ सहर आयोजना मार्फत जिल्ला सदरमुकाम फिदिमको बजार क्षेत्रमा अन्तराष्ट्रिय मापदण्डको रंगशालामा बनाउने योजना अघि सारिएको थियो । तर, बजार क्षेत्रमा जग्गा अभाव थियो । सरोकारवालाहरु जग्गा खोज्ने कार्यमा लागे । निकै समय पछि फिदिम ५ का स्थानिय बासिन्दाले जग्गा नि :शुल्क उपल्ब्ध गराउने प्रतिबद्धता व्यक्त गरे । स्थानियले भनेको जग्गा निरिक्षण पनि भयो ।

सरोकारवालाहरुले सोहि स्थानमा रंगशाला बनाउन नयाँ सहर आयोजनालाई आग्रह गरे । आयोजना त्यसका लागि तयार पनि भयो । तर, विगतमा भनिएको भन्दा अहिले फरक ढंगले नयाँ सहर आयोजनाले सामान्य खेल मैदान निर्माण गरेको छ । जसले स्थानिय बासिन्दा निराश भएका छन् । स्थानियहरुले फिदिम नगरपालिकालाई ६१ रोपनी जग्गा पास गरेर दिएका थिए ।

अहिले फिदिम उच्च माविको मैदानमा नाइन ए साइड (९ जना) खेल्न मिल्ने रंगशाला निर्माणका लागि टेन्डर खुलेपछि फिदिम ५ का स्थानियहरुमा अब आफ्नो ठाँउमा रंगशाला भन्नेमा शंका गर्न थालेका छन् । ‘रंगशाला बनाउन भनेर यता जग्गा लिइएको छ, स्थानियहरुले खेतीयोग्य स्थानिय सरकारलाइ दिएका छन् तर फिदिम बजारमा फिदिम माविको नाइन ए साइड खेल मैदान बनाउन ठेक्का खुलाएको छ,’ जग्गा दाता मध्येका गगन लावतीले भने,’ तर हामीलाई वास्ता गरिएन यसले हामीलाई थप सशंकित बनाएको छ ।’

रंगशालाका लागि भनेर उपलब्ध गराएको जग्गामा फोहोर फाल्ने डम्पिङ साइट बनाउन लागिएको आशंका स्थानियले गर्न थालेका छन् । स्थानियले जग्गा दिएर आफ्नो प्रतिबद्धता पुरा गरेको तर स्थानिय नियकाले भने अहिले बजेट छुट्टाउनुको सट्टा त्यसबाट तर्कन खोजेको आरोप जग्गादाता तथा जग्गा प्राप्ती समितिका अध्यक्ष रामचन्द्र नेपालको छ ।

स्थानीयबासीले जग्गा उपलब्ध गराएपछि नयाँ सहर आयोजनाले मैदान सम्याउने काम गरेको थियो । ६१ मध्ये ३१ रोपनी क्षेत्र सम्याउने काम बाहेक बाँकी काम अधुरै छ । प्यारापिटसहित रंगशाला बनाउने भनिएपछि स्थानीयमा खुसी थिए । तर स्थानिय निकायका प्रतिनिधिले जग्गा दातालगायत स्थानियलाई आश्वस्त पार्ने प्रयास पनि गरेका छैनन् । स्थानिय प्रतिष्ठित फाल्गुनन्द गोल्डकप, पाँचथर गोल्डकप लगायतका अन्य प्रतियोगिता समेत फिदिम उच्च माविको मैदानमा हुँदै आएको थियो ।