एजेन्सी – स्पेनिस महारथी रियल म्याड्रिडबाट लोनमा रियल सोसीडाड पुगेका नर्वेका युवा मिडफिल्डर मार्टिन ओडेगार्ड अर्को सिजन म्याड्रिड नफर्कने सोसीडाडका अध्यक्ष जोकिन अपेरिबेले बताएका छन् ।

सोसीडाडमा रहेर उत्कृष्ट प्रदर्शन गरिरहेका ओडेगार्डलाई अर्को सिजन पनि क्लबमा नै राख्ने विकल्प सोसीडाडसँग रहेको छ । अध्यक्ष अपेरिबेले ओडेगार्ड आफैं पनि उच्च लयमा रहेकाले अझै एक सिजन क्लबमै रहने विश्वास व्यक्त गरे । रियलमा हाल टोनी क्रुस, लुका मोड्रीच, क्यासेमिरो, इस्को, मार्को एसेन्सियो लगायत खेलाडी रहेकाले पनि ओडेगार्ड अझै एक सिजन म्याड्रिड नजाने अनुमान गरिएको छ ।

‘ मलाई लाग्छ ओडेगार्ड अझै एक सिजन हामीसँगै रहनेछन् । यो मेरो विश्वास हो र आशा छ उनले यहि गर्नेछन्,’ उनले भने, ‘ यदि उनी सोसीडाडमा बस्न चाहन्छन् भन्ने एक किसिमले ढुक्क बस्ने अवस्था हुन्छ, पछिल्लो वर्षझैं उनलाई समय मिल्छ । निर्णय उनले लिने भएपनि उनी बस्छन् जस्तो लाग्छ ।’

ओडेगार्डले ला लिगाको २८ खेल खेल्दै ७ गोल र ८ असिस्ट प्रदान गरेका छन् । उनकै उच्च प्रदर्शनमा सोसीडाडले कोपा डेल रेको फाइनलमा समेत स्थान पक्का गरिसकेको छ । फाइनलमा सोसीडाडले सहरी प्रतिद्वन्द्वी एथ्लेटिक बिल्बाओको सामना गर्दैछ ।

यद्यपि कोरोना संक्रमणका कारण फाइनल कहिले हुने भन्ने टुंगो लागेको छैन । ‘छोटो समयमा नै फाइनल खेल आयोजना बारे सोच्न सकिन्न । हामीले अहिले नै कुनै मितिबारे यकिन गर्न सकेका छैनौं,’ अपेरिबेले भने, ‘अहिलेको अवस्थामा दर्शकसहित फाइनल गर्ने भन्ने सोच्न सकिन्न । सिजन सकिनुअघि पनि दर्शकसहित खेल गर्न गाह्रो छ ।’