एजेन्सी – इन्टर मिलानलाई पराजित गर्दै एसएस नेपोली कोपा इटालियाको फाइनलमा प्रवेश गरेको छ । शनिबार राति भएको सेमिफाइनलको दोस्रो लेगमा १–१ गोलको बराबरी खेलेपनि नेपोलीले समग्रमा २–१ को जित निकाल्दै फाइनलमा स्थान बनाएको हो ।

पहिलो लेगमा नेपोली १–० ले विजयी भएको थियो । खेलभर नै घरेलु टोलीलाई दवावमा राखेपनि नेपोलीले बलियो रक्षापङ्ति तोड्न असमर्थ बन्दा इन्टर मिलान सेमिफाइनलबाटै बाहिरिन बाध्य बन्यो ।

खेलको दोस्रो मिनेटमा नै क्रिस्टियन इरिक्सनको गोलबाट इन्टर मिलानले अग्रता बनाएको थियो । इरिक्सनले कर्नरमार्फत सिधै गोल गरेका थिए । २२औं मिनेटमा ड्रिएस मेर्टिन्सले बराबरीको अवसर खेर फाले २८औं मिनेटमा इरिक्सनको क्रसमा रोमेलु लुकाकुको हेडिङ प्रयास पोस्टबाट थोरै बाहिरियो ।

३२औं मिनेटमा नेपोलीका गोलरक्षक डेभिड ओस्पिनाले लुकाकुकै हेडरलाई उत्कृष्ट बचाउ गरे । ४१औं मिनेटमा ड्रिएस मेर्टिन्सले लारेन्जो इन्सिग्नेको पासमा गोल गर्दै खेललाई १–१ गोलको बराबरीमा ल्याए ।

दोस्रो हाफमा पनि इन्टर मिलानले लगातार नेपोलीलाई दवावमा राखेपनि गोल गर्न असफल बन्यो । ७६औं मिनेटमा एलेक्सिस सान्चेजले तीन डिफेन्डरलाई बिट गर्दै गरेको प्रहार पोस्टबाट थोरै बाहिरियो । लगत्तै इरिक्सनको फ्रिकिकलाई ओस्पिनाले उत्कृष्ट बचाउ गरे । ८१औं मिनेटमा इरिक्सनको प्रहारमा इरिक्सन नै बाधक बन्दा खेल १–१ गोलको बराबरीमा टुंगियो ।

अब नेपोलीले उपाधिका लागि १७ जुनमा युभेन्टसको सामना गर्नेछ । युभेन्टसले एसी मिलानलाई अवे गोलमा पछि पार्दै फाइनलमा स्थान बनाएको थियो ।