एजेन्सी – ब्राजिली डिफेन्डर तथा कप्तान थियागो सिल्भा र उरुग्वेका फरवार्ड इडिन्सन काभानीले सिजनको अन्त्यसँगै फ्रेन्च क्लब पेरिस सेन्ट जर्मेन (पीएसजी) छाड्ने भएका छन् ।

क्लबका निर्देशक लियोनार्दोले ३३ बर्षिया फरवार्ड काभानी र ३५ वर्षीय कप्तान सिल्भा सिजनको अन्त्यसँगै फ्रि ट्रान्सफरमा क्लब छाड्ने पक्का भएको बताएका छन् । सिल्भा र काभनीको सम्झौता यसै सिजनसम्मको अन्त्यसम्म रहेको छ ।

‘यो साँचो हो । उनीहरुले सिजनको अन्त्यसँगै क्लब छाड्नेछन् । हाम्रो योजना उनीहलाई अगष्ट अन्त्यसम्म राख्ने हो । उनीहरुले च्याम्पियन्स लिग खेलुन भन्ने हो,’ निर्देशक लियोनार्दाेले भने । पीएसजी च्याम्पियन्स लिगको क्वाटरफाइनल पुगिसकेको छ । युरोपियन फुटबलको सर्वाेच्च निकाय (युइएफए) ले च्याम्पियन्स लिग अगस्टमा शुरु गरेर अगस्टमै सकाउने योजना अघि सारेको छ ।

पछिल्लो साता पीएसजीले लोनमा खेलिरहेका मोउरो इकार्डीलाई स्थायी रुपमा अनुबन्ध गरेपछि काभनीको पीएसजीमा भविष्य अनिश्चित बनेको थियो । तर, काभनीले गत सिजन नै पीएसजी छाड्ने मनासय बनाएका थिए । उनी गत जनवरीमा इंग्लिस क्लब चेल्सीसँग जोडिदा अहिले स्पेनिस क्लब एट्लेटिको मड्रिड र इटालियन क्लब इन्टरमिलानसँग जोडिएका छन् ।

इन्टर मिलानले आफ्ना स्टार फरवार्ड लोउटारो मार्टिनेजलाई बार्सिलोनामा बेचेको खण्डमा काभनी अनुबन्ध गर्न सक्नेछ । पीएसजीका सर्वाधिक गोलकर्ता रहेका काभनी २०१३ देखि पीएसजीमा छन् । काभनी २०१३ मा इटालियन क्लब नेपोलीबाट पीएसजी पुगेका थिए । उनले पीएसजीका लागि ३०० खेलमा २०० गोल गरेका छन् ।

चोटका कारण काभानीले यस सिजन पीएसजीबाट मात्रै २२ खेलमा अवसर पाएका छन् । उनले यो सिजन ७ गोल गरेका छन् । यस्तै डिफेन्डर थियागो सिल्भा २०१२ देखि पीएसजीमा छन् । उनी २०१२ मा इटालियन क्लब एसी मिलानबाट पीएसजी पुगेका थिए । उनले पीएसजीबाट ३१० खेल खेल्दै १७ गोल गरेका छन् । सिल्भाले यो सिजन पीएसजीका लागि ३० खेल खेल्दै १ गोल गरेका छन् ।