काठमाडौँ (हाम्रो खेलकुद) – राजधानीमा जारी ‘बि’ डिभिजन लिग फुटबल प्रतियोगिता अन्तर्गत टुसाल युवा क्लबले पुल्चोक स्पोर्ट्स क्लब विरुद्ध ५-४को रोमांचक जित दर्ता गरेको छ।
हल्चोकमा भएको खेलमा पुल्चोकले दुइ पटक खेल बराबरीमा ल्याए पनि जित हासिल गर्न सकेन। टुसालका लागि दोर्जे तामाङ (६), सुजित गुरुङ(२४,८५) र दिनेश हेन्जन(३९)ले गोल गरे भने पुल्चोकका लागि तेजेन्द्र पुन (७,३७), मिलन गुरुङ(५१) र मन्दिप थापा(८९)ले गोल गरेका थिए। पुल्चोकका अजित थापाले ६७औं मिनेटमा आत्मघाती गोल गरेर टुसाललाइ अग्रता दिलाएका थिए।
हल्चोकमा भएको दिनको पहिलो खेलमा भने बाँसबारी र महाबिर क्लबले गोलरहित बराबरी खेलेका थिए।
उता एन्फा कम्प्लेक्स सातदोबाटोमा खेलिएको खेलमा श्री कुमारी क्लबले च्यासल युथ क्लब विरुद्ध २-१को जित हासिल गर्यो। श्री कुमारीका लागि कुलदिप कार्कीले १७औं र टंक बहादुर सिङ्गदानले ३०औं मिनेटमा गोल गरेका थिए। च्यासलको लागि एकमात्र गोल कप्तान रबि ब्यन्जनकारले गरेका थिए।
