एजेन्सी – नयाँ सिजनको फ्रेन्च लिग वानमा लिल र रेनिसले १–१ गोलको बराबरी खेल्दै अंक बाँडेका छन् ।

लिलका जोनाथन बाम्वाले गोल गर्दा रेनिसका डामिन डा सिल्भाले बराबरी गोल फर्काएका थिए । दुवै टोलीले १० खेलाडीमा समेटिएर खेलको अन्त्य गरेको थियो । प्रतिस्पर्धात्मक बनेको खेलको ३५औं मिनेटमा रेनिस १० खेलाडीमा समेटिएको थियो । सचा बोइ सिधै रातो कार्ड खादै मैदानबाट बाहिरिएपछि रेनिस १० खेलाडीमा समेटिएको थियो ।

३९औं मिनेटमा जेकाको पासमा जोनाथन बाम्वाले गोल गर्दै घरेलु टोली लिललाई अग्रता दिलाए । ४२औं मिनेटमा लिल पनि १० खेलाडीमा समेटियो । रेइनिल्डो सिधै रातो कार्ड खाँदै मैदानबाट बाहिरिएपछि दुवै टोलीले दोस्रो हाफमा १० खेलाडीमा रहेका खेल्नुपरेको थियो ।

दोस्रो हाफमा दुवै टोलीले गोलका केही प्रयास गरेपनि गोलको लाग निकै संघर्ष गर्नुपरेको थियो । दोस्रो हाफमा मैदान छिरेका युवा मिडफिल्डर इडुआर्डाे कामाभिंगाको पासमा सिल्भाले ७३औं मिनेटमा गोल गर्दै खेललाई १–१ गोलको बराबरीमा ल्याए । कामाभिंगा ६३औं मिनेटमा बेन्जामिनको स्थानमा मैदान छिरेका थिए । त्यसपछि थप गोल निस्कन नसक्दा खेल १–१ गोलको बराबरीमा टुंगियो ।

यस्तै अर्काे खेलमा एन्जर्सले डिजोनमाथि १–० को कठिन जित निकालेको छ । एन्जर्सको जितमा इस्माइल ट्राओरेले पहिलो हाफमा गरेको गोल नै निर्णायक बन्यो । उनले २२औं मिनेटमा गोल गरेका थिए ।