एजेन्सी – यूईएफए च्याम्पियन्स लिगको फाइनलमा बायर्न म्युनिख र पेरिस सेन्ट जर्मेन (पीएसजी) आमने सामने हुँदा दुवै टोलीको प्रशिक्षक जर्मन नागरिक रहेका छन् ।

पोर्चुगलको लिस्बनमा हुने फाइनलमा जर्मन च्याम्पियन बायर्न म्युनिख र फ्रान्सेली च्याम्पियन पेरिस सेन्ट जर्मेन (पीएसजी) उपाधि जित्ने लक्ष्यसाथ उत्रनेछन् । खेल नेपाली समयअनुसार राति १२ः४५ बजे हुनेछ । बायर्न सिजनको तेस्रो उपाधि तथा समग्रमा छैटौं पटक च्याम्पियन्स लिग जित्ने दाउमा हुनेछ । यता, पीएसजी सिजनको पाँचौ तथा पहिलोपटक च्याम्पियन्स लिग जित्दै इतिहास रच्ने सुरमा छ ।

उत्कृष्ट खेलाडीहरुको साथ रहेकाले यि दुई टोलीबीचको खेल निकै रोमाञ्चक र प्रतिस्पर्धात्मक हुने अनुमान गरिएको छ । यति मात्र होइन यो खेललाई दुई उत्कृष्ट प्रशिक्षक बायर्नका हान्सी फ्लिक र पीएसजीका थोमस टुचेलबीचको भिडन्तको रुपमा पनि हेरिएको छ । दुवै जर्मन प्रशिक्षक हुन् ।

टुचेल १४ मे २०१८ मा पीएसजीको प्रशिक्षक नियुक्त भएका थिए । त्यसअघि उनी दुई वर्ष जर्मन क्लब बोरुसिया डर्टमुन्डको प्रशिक्षक रहेका थिए। ४६ वर्षीय टुचेलको प्रशिक्षणमा पीएसजीले १०३ खेल खेल्दा ८० जित ११ बराबरी र १२ हारको नतिजा निकालेको छ । यसक्रममा पीएसजीले यो सिजन चार उपाधि जितिसकेको छ ।

क्लबले खराब प्रदर्शन गरेसँगै बायर्नले निको कोभाकलाई बर्खास्त गर्दै ३ नोभेम्वर २०१९ मा फ्लिकलाई पूर्णकालीन प्रशिक्षक नियुक्त गरेको थियो । उनी त्यसअघि सहायक प्रशिक्षक रहेका थिए । सन् २०१४ मा जर्मनीले विश्वकप जित्दा फ्लिक टोलीको सहायक प्रशिक्षक रहेका थिए ।

५५ वर्षीय फ्लिकको प्रशिक्षणमा बायर्नले यो सिजन दुई उपाधि जितेको छ । बायर्न बुन्डेसलिगा च्याम्पियन र डिएफबी पोकल च्याम्पियन बनेको थियो । फ्लिकको प्रशिक्षणमा बायर्नले ३५ खेल खेल्दा ३२ खेलमा जित, १ बराबरी र २ हारको नतिजा निकालेको छ ।

अनुभवको हिसावले टुचेल फ्लिकभन्दा माथि छन् । तर, नतिजाको आधारमा फ्लिक पनि सफल नै देखिएको छ । यि दुवै प्रशिक्षक पनि आफ्नो प्रशिक्षणमा पहिलो च्याम्पियन्स लिग जित्ने दाउमा हुनेछन् ।

यो पनि : ‘म इतिहास रच्न पीएसजी आएको हुँ’ – एमबाप्पे