हल (एजेन्सी) – बराबरीतर्फ उन्मुख खेलको इजुरी समयमा मार्कोस रासफोर्डले गोल गरेपछि म्यानचेस्टर युनाइटेडले प्रिमियर लिगमा लगातार तेस्रो खेल जितेको छ । चार मिनेट इन्जुरी समयको दोस्रो मिनेटमा वाइने रोनीले हलका रक्षकलाई विट गर्दै निकालेको पासमा रासफोर्डले नजिकबाट वान टच गोल गरेका थिए ।
अन्तिम दुई मिनेट सम्हालिन नसक्दा हल सिटीले घरेलु मैदानमा हार बेहोर्नु परेको छ । रासफोर्ड माटाको ठाँउमा ७१ औं मिनेटमा मैदान प्रवेश गरेका थिए । सिटीले पनि अघिल्ला दुवै खेल जितेको थियो । जितपछि युनाइटेडले शीर्षस्थानमा रहेको चेल्सीसँग समान ९ अंक पुर्याएको छ । ७ अंकसहित एभर्टन तेस्रो स्थानमा छ । एक खेल कम खेलेको म्यानचेस्टर सिटी र हल सिटीको समान ६ अंक छ ।
