एजेन्सी – इतिहासमै सफल प्रदर्शन गरेको पेरिस सेन्ट जर्मेन (पीएसजी) का लागि २०१९-२० को अन्त्य भने सुखद रहन सकेन । फ्रान्समा ४ वटा उपाधि जितेको पीएसजी च्याम्पियन्स लिगको इतिहासमा पहिलो पटक फाइनल पुगको थियो ।

झन्डै दशक यता १.२ बिलियन युरो खर्च गरेको पिएसजीले शनिबार लेन्सविरुद्ध खेल्दै नयाँ सिजनको सुरुवात गर्दैछ । नयाँ सिजनको सुरुवातसँगै केहि प्रश्न पनि छन् । गत सिजन क्लबको नेतृत्व गरेका कप्तान थियागो सिल्भाले क्लब छाडेका छन् । फरवार्ड एडिन्सन काभानीले त सम्झौता सकिएपछि च्याम्पियन्स लिगसम्म पनि बसेनन् ।

‘हामीले सम्भव सबै गर्यौं । तर त्यो हाम्रो पहिलो फाइनल थियो । बार्यन म्युखिनका टोली उच्च प्रदर्शन गर्यो’, आइतबार च्याम्पियन्स लिग फाइनलपछि क्लबका अध्यक्ष नासिर अल खलिफाले भने, ‘हामीले केहि पक्षमा झै निखार ल्याउन पर्नेछ । हामी फाइनल पुग्यौं, ४ वटा उपाधि जित्यो । त्यो भनेको खराब होइन ।’

प्रशिक्षक थोमस टुचेल आफ्नो भूमिकामा निरन्तर रहने पक्का छ । स्पोर्टिङ डाइरेक्टर लियोनार्दोले पनि तत्काल क्लब छाड्ने सम्भावना नरहेको बताइएको छ । टुचेलसँगै टोलीका ब्राजिलियन सुपरस्टार नेयमार र केलियन एमबाप्पे क्लबमै रहने विश्वास पीएसजीलाई छ । नेयमार र एमबाप्पले टोलीका मुख्य हतियार हुन् ।

सुरुवाती केहि वर्ष पिएसजीमा भावनात्मक रुपमा एक हुन नसकेका ब्राजिलियन सुपरस्टार नेयमार अहिले निकै परिपक्क भएको मानिन्छ । यसपटक टोलीलाई च्याम्पियन्स लिगको फाइनलमा पुर्याउँदा नेयमारको भूमिका महत्वपूर्ण रहेको थियो । यो सिजनबाट उनको व्यवहारमा पनि परिवर्तन भएको मान्छिन् । जबकी गत वर्ष सम्म पनि उनी क्लब छाडेर पूर्व क्लब बार्सिलोना जान चाहिरहेका थिए ।

एमबाप्पले पनि अर्को सिजन पनि पिएसजीमै रहने प्रष्ट पारिसकेका छन् । यद्दपी सन् २०२२ सम्म सम्झौता रहेका उनले थप सम्झौताका लागि भने इच्छा देखाएका छैनन् । सिल्भा र कभानीसँगै म्युनिएरले पनि क्लब छाडेपछि पिएसजीले अब केहि खेलाडी अनुबन्ध गर्नेछ । टोलीमा डिफेन्डरको कमी रहेकाले बजारमा उपलब्ध खेलाडीमा पीएसजीको खर्च हुनेछ ।

आक्रमणमा माउरो इकार्डीसँग स्थायी सम्झौता भइसकेकोले पनि टुचेललाई खासै दबाब रहने छैन । मिडफिल्डमा पनि टोली सुदृढ नै छ । सिल्भाको विकल्पमा किम्पेम्बे र मार्किन्हस भएपनि त्यसपछि भने टोलीलाई अर्को विकल्पको खोजि हुनेछ । अर्को सिजन पनि च्याम्पियन्स लिग जित्ने हिसाबमै टोली निर्माण गर्ने अध्यक्ष खालिफाले प्रष्ट पारेका छन् ।

नयाँ सिजनमा पनि घरेलु प्रतियोगितासँगै च्याम्पियन्स लिगलाई लक्षित गरेर उच्च प्रदर्शनको प्रयास गर्नेछ । फ्रान्सेली लिग सुरु भइसकेको अवस्थामा खेलाडीले उचित विश्राम भने नपाउने भएका छन् । घरेलु लिगमा खासै दबाब नरहेकाले पनि टुचेलले केहि मुख्य खेलाडीलाई विश्राम दिन सक्छन् ।