एजेन्सी – यूईएफए च्याम्पियन्स लिगको उपविजेता तथा अघिल्लो सिजनको फ्रेन्च लिग वान च्याम्पियन पेरिस सेन्ट जर्मेन (पीएसजी) को नयाँ सिजनको लिग वानको पहिलो खेल स्थगित भएको छ ।

पीएसजीले लिग वानको तयारीको लागि नियमअनुसार १२ दिनको समय मागेपछि लिग आयोजकले पीएजसीको मागलाई सम्बोधन गर्दै खेल स्थगित गरेको हो । लिग च्याम्पियन पीएसजीले शनिबार राति लेन्ससँग नयाँ सिजनको पहिलो खेल खेल्ने तालिका थियो ।

पीएसजी आइतबार राति च्याम्पियन्स लिगको फाइनलमा जर्मन प्रतिद्वन्द्वीसँग १–० ले पराजित हुँदै उपविजेता बनेको थियो । पीएसजी पहिलोपटक च्याम्पियन्स लिगको फाइनलमा पुग्न सफल भएको हो । नेयमार र एमबाप्पे जस्ता स्टार खेलाडीसहित फाइनलमा उत्रिएको पीएसजीको पहिलो फाइनलमा उपाधि जित्ने सपना पुरा हुन सकेन ।

स्थगित लिग खेल अब अन्तर्राष्ट्रिय ब्रेकपछि अर्थात सेप्टेम्वर १० हुने लिग आयोजकले जनाएको छ । पीएसजी च्याम्पियन्स लिगमा व्यस्त रहँदा पीएसजीविनै फ्रेन्च लिग वान गत सातादेखि सुरु भएको छ । पहिलो चरणको ७ खेल सम्पन्न भइसकेको छ ।

गत सिजनको लिग वान कोरोना महामारी पछि शुरु हुन नसक्दा १२ अंकको अग्रतामा रहेको पीएसजीलाई च्याम्पियन घोषणा गर्दै लिग वान स्थगित गरिएको थियो । तर, कोरोना पछि अन्य लिग (ला लिगा, प्रिमियर लिग, सिरी ‘ए’ र बुन्डेसलिगा) शुरु भएर सम्पन्न भएर प्रि–सिजनको तयारीमा रहँदा फ्रेन्च लिग वान भने शुरु भइसकेको हो ।