एजेन्सी – इन्टर मिलानका अर्जेन्टिनी फरवार्ड लाउटारो मार्टिनेज अब बार्सिलोनाले भित्राउन चाहेका मुख्य खेलाडी हुन सक्नेछन् । काटलान क्लब यसअघि नै मार्टिनेजसँगको सम्झौताको नजिक पुगेको थियो । तर, सम्झौता भने हुन सकेन ।

बार्सिलोनाबाट लुइस स्वारेज बाहिरिने निश्चित भएपछि अर्जेन्टिनी स्टार बार्सिलोनाको रोजाईमा रहने विश्वास गरिएको छ । बार्सिलोनाका नयाँ प्रशिक्षक रोनाल्ड कोम्यानपले उरुग्वेली फरवार्ड स्वारेजलाई उनी आफ्नो योजनामा नरहेको प्रष्ट पारेका थिए ।

बार्सिलोनाका लागि मार्टिनेजलाई भित्राउनका लागि मुख्य समस्या भने आर्थिक कारण रहन सक्छ । उनलाई क्लबमा भित्राउनु अनेको अहिलेको खर्चमा अझै बढाउनु हो । तर, स्वारेजलाई दिदै आएको १६ मिलयन युरो पारिश्रमिक घट्दा त्यसले क्लबलाई केहि सहज हुन सक्छ । यता मेस्सीको बहिर्गमनले क्लबलाई अर्को झट्का पुगेको छ ।

अर्कोतर्फ स्वारेजको विक्रीबाट केहि आम्दानी हुने सम्भावनाले मार्टिनेजका लागि खर्च गर्न क्लबलाई सजिलो पर्न सक्छ । पछिल्लो छलफल अनुसार बार्सिलोनाले मार्टिनेजका लागि ७० मिलयन युरोको प्रस्ताव गरेको बताइएको छ । तर, इन्टरले भने ८५ मिलियन युरो माग गरेको छ । मेस्सीलाई अनुबन्ध गर्न इन्टरले पनि इच्छा देखाएकाले मार्टिनेजसहितको प्रस्तावको सम्भावना पनि रहेको छ ।

स्वारेज टोलीमा नहुनुको अर्थ मार्टिनेजले पहिलो रोजाईमा खेल्ने सम्भावना पनि रहन्छ । उनी आउँदा कोम्यानका लागि विकल्प अझै बढ्नेछन् । उनलाई पक्का स्वारेजको विकल्पको रुपमा हेरिनेछ ।

बार्सिलोनाको प्रि सिजन अर्को साताबाट सुरु हुनेछ । यद्दपी अहिले नै मार्टिनेज बार्सिलोनामा आबद्ध भइहाल्ने छैन । तर, केहि सातामा उनको विषयमा केहि टुंगो लाग्ने सम्भावना छ । त्यसअघि बार्सिलोनाले कप्तान लिओनेल मेस्सीको अवस्थाबारे पनि प्रष्ट हुन जरुरि छ ।