एजेन्सी – क्याटलान क्लब बार्सिलोनाले सुपरस्टार फरवार्ड तथा कप्तान लिओनेल मेस्सीलाई क्लबमै राख्ने प्रयास गर्ने जानकारी दिएको छ । क्लबका खेलकुद निर्देशक रामोन प्लानेसले बुधबार भएको पत्रकार सम्मेलनमा मेस्सीको पत्र प्राप्त भएपछि क्लबले अबको योजनाबारे छलफल गरिरहेको बताए ।

क्लबले बुधबार नयाँ फरवार्ड फ्रान्सिस्को त्रिन्काओसँग औपचारिक सम्झौतासँगै पत्रकार सम्मेलनको आयोजना गरेको थियो । उक्त कार्यक्रममा क्लबका अध्यक्ष जोसेप मारिया बार्टोमेउ उपस्थित हुने भनिएपनि अन्तिम समयमा प्लानेसले उनको स्थान लिएका थिए । बार्टोमेउले पत्रकारसमक्ष अहिले नै बोल्न नचाहेको हुनाले प्लानेस कार्यक्रममा सहभागी भएका थिए ।

त्रिन्काओको अनुबन्धन घोषणा कार्यक्रम भएपनि पत्रकार सम्मेलनमा अधिकांश प्रश्न भने मेस्सीको सम्झौता र क्लबको अवस्थाबारे नै रहेको थियो । त्रिन्काओलाई पनि मेस्सी र सुआरेजले छोड्न लागेको अवस्थामा क्लबमा आउँदा कस्तो अनुभव भइरहेको छ भन्ने प्रश्न गरिएको थियो । त्यसमा उनले भने, ‘पक्कैपनि म चाहन्छु की मेस्सी बार्सिलोनामै रहुन् । तर मेरो इच्छा र अभिव्यक्तिले केहि असर गर्दैन । हेरौं स्थिति के हुन्छ, ।’

जब त्रिन्काओसँग प्रश्नोत्तर सकियो, त्यसपछि प्लानेसले पत्रकारको प्रश्न लिँदा स्थिति फेरियो । धेरैको एकै किसिमको प्रश्न रहेको बुझ्दै प्लानेसले क्लबको अवस्था र मेस्सीले पठाएको पत्र प्राप्त गरेपछि क्लबले गरेको बैठकबारे आफ्नो धारणा राखे ।

‘मेस्सीबाट हिजो राति आएको पत्रले सबैलाई आश्चर्य तुल्यायो । तर हामीले सोचेको र भन्दै आएको यहि हो की मेस्सी बार्सिलोनाक खेलाडी हुन् । आज त्रिन्काओ आएका छन् र हामीले चाहन्छौं की उनले मेस्सीसँग खेलेर क्लबलाई सफलता दिलाउनेछन् ।

बार्सिलोनाले यसअघि पनि इतिहासमा धेरै पटक टोली पुनर्निर्माण गरेको छ । सधैं हामीले राम्रो टोली बनाउन सकेका छौं । अहिले पनि हामी विश्व फुटबलकै उत्कृष्ट खेलाडीको वरपर रहेर टोली बनाउन चाहन्छौं । लिओले क्लबको लागि जति गरेका छन् त्यसको जति चर्चा गरेपनि कम छ । उनले बेग्लै इतिहास बनाएका छन् ।

हामी अहिले सम्झौता र त्यसमा रहेका प्रावधानबारे सोचिरहेका छैनौँ । मेस्सी र बार्सिलोनाको सम्बन्ध अटुट छ र यसले दुवै पक्षलाई धेरै फाइदा पुगेको छ । जति फाइदा हामीलाई छ त्योभन्दा धेरै खुसी समर्थकले पाएका छन् । हामी अन्तरिक छलफल गरेर मेस्सीलाई क्लबमै रहने गरि मनाउन खोजिरहेका छौं । अहिलेको आवश्यकता भनेको क्लब र मेस्सी दुवैलाई राम्रो हुने किसिमको समाधान खोज्नु हो ।

हामीले पेड्री र त्रिन्काओजस्ता युवा खेलाडी जम्मा पारेर एक विजयी टोली निर्माण गर्न चाहेका छौं । सबै क्लब अहिलेको स्थितिमा समस्यामा छन् । अहिले बार्सिलोना र मेस्सीबीच कुनै समस्या छैन, दुवै पक्ष यसको भागीदार पनि छैनन् । हाम्रो लक्ष्य बार्सिलोनालाई एक अब्बल टोली बनाउनु हो ।

क्लबमा मेस्सीलाई लिएर कुनै प्रकारको दुविधा छैन । जसले फुटबल बुझेको छ, उसले मेस्सी यहीं रहोस भन्ने चाहन्छ । उनी एक विजेता हुन् ।‘

नयाँ प्रशिक्षक कोम्यानले नियुक्तिपछि आफ्नो योजनामा नरहेका खेलाडीलाई आफैंले सम्पर्क गरेर टोलीमा स्थान नरहेको बताएको खबरबारे पनि प्लानेसले जानकारी दिए । ‘ क्लबले नयाँ योजनाका लागि कोम्यानसँग अन्तरिक रुपमा तयारी गरिरहेको छ । प्रशिक्षक आफैंले खेलाडीसँग सम्पर्क गर्न चाहेका हुन् । उनले केहि खेलाडीसँग छलफल गरिसके र केहिसँग आउने दिनमा गर्नेछन्,’ प्लानेसले भने ।

‘ बार्सिलोनाका लागि योगदान दिने खेलाडीलाई हामी सम्मान गर्छौं । अहिलेको कठिन समयमा केहि निर्णय निकै कठोर हुन्छन् । केहि निर्णयले हामीलाई पनि दुख पुर्याएको छ । तर जे हुन्छ त्यो हामीबीच भएको छ र बाहिर थाहा नहोस भन्ने चाहन्छौं ।’

‘मेस्सीले हालसम्म पनि प्रशिक्षणमा उपस्थित नहुने भनेर जानकारी दिएका छैनन् । तर हामीबीच जे वार्ता भएपनि त्यो बाहिर नआवोस भन्ने हाम्रो चाहना हो । हामी एक अरकको सम्मान गर्न चाहन्छौं । हामी पछि पनि सहज रुपमा वार्ता होस् भन्ने चाहन्छौं ।’

‘ हामी गत सिजन भन्दापनि राम्रो टोली बनाउन प्रयासरत छौं । प्राविधिक टोलीले यसबारे अध्ययन गरिरहेको छ । विगतमा प्राविधिक टोलीको निर्णयका कारण निकै आलोचना खेप्नुपरेको छ । यो यस्तो काम हो जसका लागि धन्यवाद मात्र पाउन पनि कठिन छ । तर समयसँगै नतिजा आउनेमा हामी विश्वस्त छौं ।’

प्लानेसको यो अभिव्यक्तिले बार्सिलोना बोर्ड अझैपनि मेस्सी क्लबमै रहने आशामा रहेको बताउँछ । क्लबनिकट स्रोतले स्पेनिस संचारमाध्यमलाई उपलब्ध गराएको पत्र अनुसार मेस्सीले आफ्नो सम्झौतामा उल्लेख गरिएको प्रावधान अनुसार सम्झौता रद्द गर्न चाहेका छन् । मेस्सीले ब्युरोफ्याक्स मार्फत क्लबलाई पत्र पठाएका थिए । स्पेनको अदालतले आधिकारिक मान्ने ब्युरोफ्याक्स माध्यमको प्रयोग गर्दै मेस्सीले पत्रमार्फत सम्झौता रद्द गर्न भनेका हुन् ।

मेस्सीको पत्रमा यस्तो लेखिएको छ :

‘ यो पत्रको माध्यमबाट, म, लिओनेल आन्द्रेस मेस्सी कुचीटिनि, आइडी नम्बर (खालि) बाट, अनुरोध गर्दछुकी क्लबसँग रहेको मेरो व्यावसायिक सम्झौता रद्द होस् । सम्झौतामा रहेको बुँदा नम्बर २४ ले मलाई यो अधिकार प्रदान गरेको छ ।

मेरो व्यक्तिगत विकास र व्यावसायिक सम्बन्ध विकासका लागि क्लबले मेरो यहाँको बसाइभर दिएको अवसरप्रति म आभारी छु ।

मैले यहाँ प्राविधिक र व्यक्तित्व विकासमा धेरै कुरा सिक्ने अवसर पाएँ । अहिले भने व्यक्तिगत कारण (खालि) का कारण म कठिन निर्णय लिन बाध्य छु । मलाई आशा छ मलाई क्लब व्यवस्थापनले सहज रुपमा समन्वय गर्नेछ ।’

यस्तो छ पत्र :

मेस्सीले आफ्नो सम्झौतामा रहेको प्रावधान अनुसार गत सिजनको अन्त्यसँगै आफ्नो सम्झौता रद्द गर्न पाउने प्रावधानको प्रयोग गर्दै क्लब छाड्न चाहेको बताएका छन् । मेस्सीको सम्झौता अनुसार जुन १ सम्म उनले चाहेको अवस्थामा उनले कुनै रकम नतिरी क्लब छाड्न पाउने थिए ।

तर सामान्य अवस्थामा मे महिनामै सकिने सिजन यसपटक कोरोना भाइरस संक्रमणका कारण लम्बिएको थियो । यससँगै मेस्सीले आफ्नो सम्झौता अनुसार सम्झौताको प्रावधान मान्य रहने जानकारी दिँदै क्लबलाई सम्झौता रद्द गर्न आग्रह गरेका छन् । यस विषयमा छलफल गर्न बार्सिलोनाले क्लबको आकस्मिक बैठक डाकेको छ ।

मेस्सीले गत शुक्रबार क्लबका नयाँ प्रशिक्षक रोनाल्ड कोम्यानसँग भेटघाट गरेका थिए । त्यसबेला नै उनले आफू लामो समय क्लबमा नरहने प्रष्ट पारिसकेका थिए । क्लबको बोर्डसँग राम्रो सम्बन्ध नरहेका मेस्सीले कोम्यानसँग भेटघाटपछि क्लब छाड्ने निर्णय लिएको बुझिएको छ ।

क्लबमा रहेको २ दशकपछि विश्व फुटबललाई नै आश्चर्यचकित बनाउँदै मेस्सीले बार्सिलोना छाड्ने निर्णय लिएका छन् । अब क्लबको बोर्ड बैठकले उनको आग्रहबारे छलफल गर्नेछ ।