एजेन्सी – लन्डन क्लब चेल्सीले प्रिमियर लिग क्लब लेस्टर सिटीका इंग्लिस डिफेन्डर बेन चिलवेललाई अनुबन्ध गरेको छ । चेल्सीले २३ वर्षीय लेफ्टब्याक ५० मिलियन पाउन्डमा ५ वर्षको लागि अनुबन्ध गरेको हो ।

चिलवेलले लेस्टरसँगको ११ बर्षको बसाईलाई अन्त्य गर्दै चेल्सी आएका हुन् । उनलाई अनुबन्ध गर्नको लागि म्यानचेस्टर सिटीले पनि चासो देखाएको थियो । उनी २००९ मा लेस्टर सिटीमा आबद्ध भएका थिए ।

सन् २०२५ सम्म चेल्सीमा रहने चिलवेलले प्रतिसाता १ लाख ९० हजार पाउन्ड प्राप्त गर्नेछन् । खेलाडी अनुबन्धमा आक्रमक देखिएको चेल्सीले यसअघि दुई खेलाडी हाकिम जिएक र टिमो वेर्नरलाई क्लबमा भित्र्याइसकेको छ ।

यसअघि दुई पटक खेलाडी ट्रान्सफरमा प्रतिबन्ध भोगेको चेल्सीले यो समरमा खेलाडी अनुबन्धको लागि खुलेर खर्च गरिरहेको छ । चिलवेल, वेर्नर र जिएकको लागि १३६ मिलियन पाउन्ड खर्च गरिसकेको छ । चेल्सी जर्मनीका काई हाभर्टज र ब्राजिलका थियागो सिल्भालाई अनुबन्ध नजिक छ ।

‘क्लबका लागि यस रोमाञ्चक समयमा जोडिन पाउँदा खुसी छु । फ्रान्क लाम्पार्डको नेतृत्वमा यस युवा र प्रतिभाशाली टिमको हिस्सा बन्नका लागि उत्सुक थिएँ । हामी अर्को सिजन यस सम्मानका लागि चुनौती दिनेछौं,’ सम्झौतपछि चिलवेलले भनेका छन् ।

चेल्सीकी निर्देशक मरिना ग्रानोब्सकियाले आउने सिजनका लागि तेस्रो अनुबन्धन पुरा गर्न पाउँदा निकै खुसी रहेको र बेन आफ्नो छोटो उमेरमा प्रिमियर लिग, च्याम्पियन्स लिग र अन्तराष्ट्रिय स्तरमा खेल्ने शीर्ष स्तरको अनुभव प्राप्त गरिसकेका खेलाडीको रुपमा रहेको बताइन् ।

चिलवेलले लेस्टरका लागि १ सय २३ खेलमा ४ गोल समेत गरेका छन् । उनले इंग्ल्यान्डका लागि ११ क्याप जितेका छन् ।