एजेन्सी – फ्रान्सेली क्लब पेरिस सेन्ट जर्मेन (पीएसजी) का पूर्व फरवार्ड एडिन्सन काभानीले इटालियन च्याम्पियन युभेन्टसको प्रस्तावलाई अस्वीकार गरेका छन् ।

रिपोर्टअनुसार पूर्व क्लब नेपोलीप्रतिको वफादारी र स्न्नेहका कारण ३३ वर्षे काभानीले युभेन्टसको प्रस्तावलाई अस्वीकार गरेको बुझिएको छ । स्काई स्पोर्ट्स इटालियाको दावीअनुसार काभानीले टुरिनमा आन्द्रे पिर्लाेको टिम पुनर्निर्माणको हिस्सा बन्ने अवसरलाई खारेज गरिसकेको र अन्य क्लबको खोजीमा रहेको उल्लेख गरेको छ ।

काभानीलाई अनुबन्ध गर्नको लागि पोर्चुगिज क्लब बेन्फिकाले प्रयास गरेपनि महँगो रकमका कारण यो सफल हुन सकेको थिएन । काभानीले बेन्फिकासँग वार्षिक ८.८ मिलियन डलरमा तीन वर्षको सम्झौता माग गरेपछि बेन्फिका पछि हटेको हो ।

यसबीचमा स्पेनिस महारथी रियल म्याड्रिडले फ्रि एजेन्ट काभानीलाई अनुबन्ध गर्ने योजना बनाएको छ । रियलले आश्चर्यचकित रुपमा काभानी अनुबन्ध गर्ने योजना अघि सारेको हो । रियलले यो सिजन कुनै पनि नयाँ खेलाडी अनुबन्ध नगर्ने बताइरहँदा ट्रान्सफर रकम खर्च गर्न नपर्ने हुनाले अनुबन्ध गर्ने सम्भावना छ ।

रियल म्याड्रिडले ३३ वर्षे फरवार्ड अनुबन्ध गर्नको लागि लुका जोभिक र मारियानो डियाजलाई बेच्नुपर्ने गाजेट्टा डेल स्पोर्ट्सले उल्लेख गरेको छ । जोभिक र डियाजले प्रशिक्षक जिनेदिन जिदानको मन जित्न सकेका छैनन् । त्यसैले पनि रियलले यि दुई खेलाडी बेचेर काभनी अनुबन्ध गर्न सक्नेछ ।

रियलका पदाधिकारीसँगको भेटमा काभनी जनवरीमै आउन सहमत भएपनि पीएसजीले सोचेभन्दा बढी रकम माग गरेपछि सरुवा सफल हुन सकेको थिएन । पीएसजीले काभानीको लागि २७ मिलियन अर्थात ३० मिलियन युरो माग गरेको थियो । जुन रियलले सोचेभन्दा बढी रकम थियो । स्पेनिस पत्रिका मार्काका अनुसार काभानी रियल आउन उत्साहित थिए ।

काभनीले यो सिजनको अन्त्यसँगै पीएसजीसँग सम्झौता समाप्त भएपछि क्लब छाड्ने घोषणा गरेका थिए । काभानीलाई अनुबन्ध गर्न रियल मात्र होइन युरोपका अन्य ठुला क्लबले पनि चासो देखाएका छन् । प्रिमियर लिगमा भर्खरै बढुवा भएको लिड्स युनाइटेडले पनि नाम चलेका खेलाडी भित्र्याउने महत्वाकाङ्क्षी योजना अघि सार्दा काभानी पनि त्यो सुचीमा छन् ।

उरुग्वेली क्लब डानुवियोबाट व्यवसायिक खेल करियर शुरु गरेका काभानीले इटालियन क्लब पालेर्माेबाट पनि खेलेका थिए । काभानी पालेर्माेबाट २०१० मा नेपोली पुगेका थिए । त्यसपछि उनी २०१३ मा पीएसजी पुगेका थिए ।

काभानीले पीएसजीका लागि ३०१ खेलमा २०० गोल तथा इटालियन क्ल नेपोलीका लागि १३८ खेलमा १०४ गोल गरे । २००८ देखि उरुग्वेको टोलीमा रहेको काभनीले ११६ खेलमा ५० गोल पुरा गरेका छन् ।