एजेन्सी – बायर्न म्युखिनका मिडफिल्डर थोमस मुलर आफ्नो विचार खुलस्त राख्न परिचित छन् । बायर्नले यो सिजन च्याम्पियन्स लिग उपाधि जितिसकेको छ ।

फाइनलमा पीएसजीलाई पराजित गरेपनि क्वार्टरफाइनलमा बायर्नले बार्सिलोनालाई ८–२ ले हराएको खेलको अहिले पनि चर्चा हुने गरेको छ । मुलरको नजरमा त्यो खेलमा बार्सिलोना बढी नै आराममा देखिएको थियो ।

जर्मन फरवार्डले बार्सिलोनाले भन्दा आफ्नो टोलीले राम्रो तयारी गरेको बताएका छन् । ‘म हाम्रा प्रशिक्षकलाई बधाई दिन्छु’, उनले बार्सिलोनाका बारेमा भने, ‘उदाहरणका लागि भनौं बार्सिलोना वार्म अपका लागि त्यति बेला मात्र मैदानमा आएको थियो, जति बेला हामीले वार्म अप गरेको १० मिनेट बितिसकेको थियो ।’

मुलरले बार्सिलोना बढी नै आराममा देखिएको पनि उनले सुनाए । ‘एउटा उदाहरणले नै हारेको अर्थ लगाउन मिल्दैन,’ उनले थपे,’ तर त्यस्ता विषयले खेलमा फरक पार्न सक्थ्यो । तर, मलाई लाग्छ हामी जितका लागि निकै भोका थियौं । उनीहरु हामीभन्दा बढी नै आरामदायी देखिएका थिए ।’

लियोनल मेस्सीले बार्सिलोना छाड्न लागेको विषयमा पनि मुलरले आफ्नो विचार राखेका छन् ।
‘पछिल्लो सय बर्षमा मेस्सी यो ग्रहका उत्कृष्ट खेलाडी मध्ये एक हुन् ,’ उनले भने, ‘उनको बर्हिगमन भयो भने विश्व फुटबलमा कस्तो परिवर्तन आउँछ उत्सुकतापूर्ण हुनेछ । यसमा कसैले आलोचना गर्दैनन् । म उनको नयाँ यात्रालाई उत्सुकताका साथ हेरिरहेको छु ।’

बायर्नमा लाने विषयमा मुलरले ठट्टा गर्दौ भने, ‘मैले हाम्रो सिइओसँग एक दुई पटक यो विषयमा भनेको पनि थिए । तर त्यो मलाई लाग्छ यसमा हामीले भने जसरी हुने होइन ।’