एजेन्सी – युवा फरवार्ड एर्लीङ हालान्डले अपेक्षित प्रदर्शन गर्न नसक्दा नर्वेको युरोपेली च्याम्पियनसिप खेल्ने आशा समाप्त भएको छ ।

बिहीबार भएको प्लेअफ खेलमा सर्बियाले अतिरिक्त समयमा नर्वेलाई २-१ ले पराजित गर्दै छनोट प्लेअफको फाइनलमा स्थान पक्का गरेको हो । सर्बियाको जितमा दुवै गोल इटालियन क्लब लाजियोबाट खेल्दै आएका मिडफिल्डर सर्गे मिलिन्कोभिच साभिचले गरे । नर्वेका माथिआस नोर्मनले गोल गरेका थिए ।

सर्बियाका लागि सर्गेले खेलको ८२ औं मिनेटमा गोल गर्दै जिततर्फ अग्रसर गराएका थिए । तर नोर्मनले खेलको २ मिनेट बाँकी हुँदा गोल गरेपछि अतिरिक्त समयमा खेल लम्बिएको थियो । अतिरिक्त समयको १ सय २ औं मिनेटमा सर्गेले पेनाल्टी क्षेत्र भित्रबाट चिप सटमा गोल गर्दै सर्बियालाई युरोपेली छनोटबाट एक कदम नजिक पुर्याए ।

सर्बियाले अब प्लेअफको फाइनलमा स्कटल्यान्डको सामना गर्नेछ । सक्टल्यान्डले इजरायललाई टाइब्रेकरमा पराजित गर्दै फाइनलमा स्थान पक्का गरेको हो । अर्को प्लेअफ फाइनलमा आइसल्याण्ड र हंगेरीले खेल्नेछन् । आइसल्याण्डलले रोमानियालाई २-१ ले पराजित गर्दा हंगेरीले बुल्गेरियामाथि ३-१ को जित दर्ता गर्यो ।

उत्तरी आयरल्यान्डले पेनाल्टी सुटआउटमा बोस्निया हर्जगोभिनालाई १-१ को बराबरीपछि ४-३ ले पराजित गर्यो । स्लोभाकिया र आयरल्याण्डको खेल गोलरहित बराबरीमा सकिएपछि भएको टाइब्रेकरमा स्लोभाकिया ४-२ ले विजयी भयो । अब युरोमा स्थानका लागि उत्तरी आयरल्याण्ड र स्लोभाकिया खेल्नेछन् ।

अन्तिम प्लेअफ फाइनलमा उत्तरी म्यासेडोनिया र जर्जिया खेल्नेछन् । म्यासेडोनियाले कोसोभोलाई २-१ ले हरायो । जर्जियाले बेलारुको चुनौती १-० ले पछि पार्दै युरो छनोटनजिक पुगेको हो ।