एजेन्सी – इंग्लिस क्लब म्यानचेस्टर युनाइटेडका फ्रान्सेली मिडफिल्डर पल पोग्बाले स्पेनिस क्लब रियल म्याड्रिडबाट खेल्ने सपना रहेको बताएका छन् ।

विश्व विजेता फ्रान्सका २७ वर्षिय आक्रामक मिडफिल्डर पोग्बा लामो समयदेखि म्याड्रिडसँग जोडिएपनि उनीहरुबीच सहमति हुन सकेको छैन । पोग्वा २०१६ मा इटालियन क्लब युभेटन्सबाट इंग्लिस क्लब म्यानचेस्टर युनाइटेडमा ८९ मिलियन पाउन्डमा अनुबन्धित भएका थिए ।
त्यसपछि पोग्वालाई स्पेनिस क्लब रियलले अनबुन्धको लागि चासो देखाएपनि पोग्वाको चोटका कारण छलफल अघि बढ्न सकेको थिएन ।

युनाइटेडमा पोग्बाको सम्झौता अर्काे सिजनको समरमा सकिदैछ । सम्झौता अवधि १० महिना मात्रै बाँकी रहँदा सम्झौता नविकरणको विषयमा कुनै छलफल अघि नबढेको पोग्बाले बताएका छन् । तर, युनाइटेडले आफ्नो स्टार पोग्बालाई २०२२ सम्म राख्न सक्नेछ ।

‘मलाई कसैले केही भनेको छैन । मैले पनि केही कुरा गरेको छैन । हामीले नयाँ सम्झौताको विषयमा कुरा गरेका छैननौं,’ उनले फ्रान्सेली राष्ट्रिय टिमको पत्रकार सम्मेलनमा भने, ‘अहिलेको अवस्थामा म युनाइटेडमा छु । म आफ्नो उत्कृष्ट फर्मलाई फिर्ता ल्याउन केन्द्रित छु । ‘मलाई लाग्छ, त्यस्तो समय आउनेछ । जब क्लबले कुरा गर्नेछ । हुन सक्छ मलाई केही प्रस्ताव गर्नेछ । वा नगर्न पनि सक्छ ।’

पोग्बाले सबै फुटबलर रियल म्याड्रिडबाट खेल्न मन पराउने र अहिले युनाइटेडबाट खेलिरहेको र यही नै रमाइलो क्षण व्यतित गरिरहेको बताएका छन् ।

युनाइटेडले नयाँ सिजनमा खराब सुरुवात गर्दा पोग्बाले सुरुवाती तीनै खेलमा मौका पाएका छन् ।
तीन खेलमा युनाइटेडले पहिलो खेलमा मात्र जित निकालेको छ । लिगको पछिल्लो खेलमा युनाइटेडले टोटेनहम हट्स्परसँग ६–१ को लज्जास्पद हार बेहोरेको थियो ।