एजेन्सी – इंग्लिस क्लब लिभरपुलका स्पेनिस मिडफिल्डर थियागो अलकान्तारा कोरोनामुक्त भएका छन् । सेप्टेम्वर अन्तिमसाता कोरोना संक्रमण भएका उनले १० दिन बढीको सेल्फ आइसोलेसन बसाईपछि कोरोनामुक्त भएका हुन् ।

लिभरपुलले २९ वर्षीय थियागो कोरोनामुक्त भएको पुष्टि गरेको छ । यस्तै अलकान्तराले पनि सामाजिक सन्जालमा ‘लिभरपुल वाल्क’ भनेर बाहिर घुमेको पोस्ट गरेका छन् । कोरोना संक्रमण भएसँगै अलकान्तराले लिभपुलको पछिल्लो दुई खेलसँगै अन्तर्राष्ट्रिय ड्युटी समेत गुमाएका थिए ।

यसै समरमा जर्मन क्लब बायर्न म्युनिखबाट लिभरपुल आएका अलकान्तराले चेल्सीविरुद्धको खेलमा प्रिमियर लिगमा ‘डेब्यु’ गरेका थिए । तर, अलकान्तराले त्यसपछिको दुई खेल गुमाएका थिए ।

यस्तै लिभरपुलका अर्काे मिडफिल्डर जेर्डान शाकिरी पनि कोरोनामुक्त भएका छन् । उनले युइएफए नेसन्स लिगमा स्पेनविरुद्धको १–० ले पराजित भएको खेल खेलेका थिए । अर्का फरवार्ड साडियो माने पनि कोरोनासँग जुधिरहेका छन् ।

अन्तर्राष्ट्रिय विश्रामपछि योर्गेन क्लोपको लिभरपुलले मर्सिसाइड डर्वीमा १७ अक्टोवरमा एभर्टनसँग प्रतिस्पर्धा गर्दैछ । उक्त खेलमा अलकान्तराले खेल्न सक्नेछन् । प्रिमियर लिग च्याम्पियन लिभरपुलले सुरुवाती तीन खेलमा शत प्रतिशत जित निकालेपनि चौथो राउन्डमा एस्टन भिल्लासँग ७–२ को लज्जास्पद हार बेहारेको थियो ।

यस्तै कारवाओ कपमा पनि पेनाल्टी सुटआउटमा आर्सनलसँग पराजित भएको थियो ।