एजेन्सी – युइएफए नेसन्स लिगको तेस्रो राउन्डको खेलमा आज (आइतबार) राति विश्वविजेता फ्रान्स र युरो तथा नेसन्स लिग विजेता पोर्चुगलबीच प्रतिस्पर्धा हुँदैछ ।

खेल स्टेड डि फ्रान्समा नेपाली समयअनुसार राति १२ः३० बजे हुनेछ । भेट्रान रोनाल्डो र युवा फरवाड केलियन एमबाप्पेबीचको खेल निकै रोचक र प्रतिस्पर्धात्मक हुने अपेक्षा गरिएको छ । घरेलु मैदानमा फ्रान्स पोर्चुगललाई पराजित गर्दै लिग ‘ए’ ३ को शीर्षस्थानमा उक्लने दाउमा हुनेछ । २ खेलबाट समान ६ अंक भएपनि गोल अन्तरमा पोर्चुगल शीर्षस्थानमा तथा फ्रान्स दोस्रो स्थानमा रहेको छ ।

स्टार खेलाडीले भरिएको फ्रान्ससँग केलियन एमबाप्पे, ओलिभर जिरुउड, एन्टाइन ग्रिजमन, पल पोग्वा, एङ्गोलो कान्टे र राफायल भरानजस्ता खेलाडीको साथ रहेको छ । यसबाहेक फ्रान्ससँग बेन्जामिन पाभार्ड, क्लेमेन्ट लेङ्लेट, कोरेन्टिन टोलिसो, लुकास हर्नान्डेज, इडुआर्डाे कामाभिंगा, लुकास डिग्ने, विसाम विन यडर, प्रेसनेल केम्पेम्वे र अनुभवी गोलरक्षक ह्युगो लोरिसको साथ रहेको छ ।

मैत्रीपुण खेलमा युक्रेनमाथि ७–१ को फराकिलो जित निकालेको फ्रान्स सोही लयलाई निरन्तरता दिन दाँउमा हुनेछ । युक्रेनविरुद्धको फराकिलो सजतमा जिरुउडले ह्याट्रिक पुरा गर्दा कामाभिंगा, टोलिसो , ग्रिजमन र एमबाप्पेले पनि गोल गरेका थिए ।

विश्वविजेता फ्रान्स पछिल्लो ७ खेलमा अपराजित रहेको छ । गत वर्षको अक्टोवरमा युरो छनोटमा टर्कीसँग १–१ गोलको बराबरी खेलेयता फ्रान्सले सबै पाँच खेलमा शतप्रतिशत जित निकालेको छ । युरो र नेसन्स लिग विजेता पोर्चुगलसँग पनि फ्रान्स जितको लक्ष्यसहित मैदान उत्रनेछ ।

यता, आधुनिक फुटबलको हस्ती मध्येको एक क्रिस्टियानो रोनाल्डोको कप्तानीमा रहेको पोर्चुगल पनि फ्रान्सलाई उसकै मैदानमा स्तब्ध पार्दै शीर्षस्थानमा पकड बनाउने दाँउमा हुनेछ ।

पोर्चुगलसँग रोनाल्डोसँगै जोआओ फेलिक्स, ब्रुनो फर्नान्डेस, बर्नाडो सिल्भा, रुवेन नेभेस, जोओ मौटिन्हो, राफयल गुरेरो, पेपे, रुवेन डियास, जोओ क्यान्सिलो, विलियम कार्भाल्हो, नेल्सन सेमेडो, डिएगो जोटा, ट्रिन्काओ, आन्द्र सिल्भा र गोलरक्षक रुइ प्याट्रेसियो रहेका छन् ।

पछिल्लो ७ खेलमा पोर्चुगलले ५ खेलमा सफलता हात पार्दा समान १ बराबरी र हारको नतिजा निकालेको छ । गत अक्टोवरमा भएको युरो छनोटमा युक्रेनसँग २–१ ले पराजित भएयता पोर्चुगल पछिल्लो सबै पाँच खेलमा अपराजित रहेको छ । गत बिहीबार राति भएको मैत्रीपुर्ण खेलमा पोर्चुगलले स्पेनसँग गोलरहित बराबरी खेलेको थियो ।

यि दुई टोली २०१६ पछि पहिलोपटक खेल्न लागेका हुन् । २०१६ मा युरोकपको फाइनलमा पोर्चुगलले घरेलु टोली फ्रान्समाथि अतिरिक्त समयमा १–० को जित निकाल्दै युरोकप च्याम्पियन बनेको थियो । त्यसअघिको दुवै खेलमा फ्रान्स विजयी भएको छ ।

यही लिग ‘ए’ ३ को अर्काे खेलमा क्रोएसिया र स्वीडेन प्रतिस्पर्धा गर्दैछ । दुवै टोली समूहका पहिलो अंक जोड्ने लक्ष्यमा हुनेछ । खेल क्रोएसियामा राति ९ः४५ बजे हुने छ । दुवै टोली फ्रान्स र पोर्चुगलसँग पराजित भएको थियो ।

अन्य खेल

लिग ‘ए’ ग्रुप – १ : बोस्निया एन्ड हर्जगोभिनाविरुद्ध नेदरल्यान्ड्स (राति ९ः४५ बजे), पोल्यान्डविरुद्ध इटाली (राति १२ः३० बजे)

लिग ‘ए’ ग्रुप – २ : इंग्ल्यान्डविरुद्ध बेल्जियम (राति ९ः४५ बजे), आइसल्यान्डविरुद्ध डेनमार्क (राति १२ः३० बजे)

लिग ‘ए’ ग्रुप – ३: क्रोएसियाविरुद्ध स्वीडेन (राति ९ः४५ बजे), फ्रान्सविरुद्ध पोर्चुगल (राति १२ः३० बजे)

लिग ‘बी’ – १: नर्वेविरुद्ध रोमानिया (राति ९ः४५ बजे), नर्दन आयरल्यान्डविरुद्ध अष्ट्रिया (राति १२ः३० बजे)

लिग ‘बी’ – २ : इजरायलविरुद्ध चेक रिपब्लिक (राति १२ः३० बजे), स्कटल्यान्डविरुद्ध स्लोभाकिया (राति १२ः३० बजे)

लिग ‘बी’ – ३: रसियाविरुद्ध टर्की (राति १२ः३० बजे), सर्वियाविरुद्ध हंगेरी (राति १२ः३० बजे)

लिग ‘बी’ – ४ : आयरल्यान्डविरुद्ध वेल्स (साँझ ६ः४५ बजे), फिनल्यान्डविरुद्ध बुल्गेरिया (राति ९ः४५ बजे)

लिग ‘सी’ –२ : अर्मेनियाविरुद्ध जर्जिया (राति ९ः४५ बजे), इस्टोनियाविरुद्ध नर्थ म्यासेडोनिया (राति ९ः४५ बजे)

लिग ‘सी’ –३ : ग्रीसविरुद्ध माल्दोभा (राति १२ः३० बजे), कोसोभोविरुद्ध स्लोभेनिया (राति १२ः३० बजे)

लिग ‘सी’ – ४ : काजकस्तानविरुद्ध अल्वानिया (राति ६ः४५ बजे), लिथुआनियाविरुद्ध बेलारुस (राति ९ः४५ बजे)