काठमाडौं (हाम्रो खेलकुद) – नेपाली राष्ट्रिय फुटबल टोलीका युवा फरवार्ड अभिषेक रिजालले दुई गोल गरेपछि मोहमडन स्पोर्टिङ क्लबले आइ लिग छनोट प्रतियोगितामा लगातार दोस्रो जित दर्ता गरेको छ ।

आइतबार छनोटको दोस्रो खेलमा अहमदाबाद र्‍याकेट एकेडेमी फुटबल क्लबलाई ४-१ ले पराजित गर्दै मोहमडन अंक तालिकाको शीर्ष स्थानमा उक्लिएको हो । मोहमडनको जितमा अभिषेकले २ गोल तथा विलिस प्लाजा र शेख फैयाजले एक-एक गोल गरे । पछिल्लो खेलमा वैकल्पिक खेलाडीको रुपमा मैदान प्रवेश गरेका अभिषेकले दोस्रो खेलमा भने सुरुवाती रोजाईमा नै अवसर पाएका हुन् ।

खेलको १२ औं मिनेटमा नै विलिस प्लाजाको गोलमा मोहमडनले अग्रता लिएको थियो । त्यसको ८ मिनेटपछि अभिषेकले गोल गर्दै मोहमडनको अग्रता दोब्बर पारे । हिरा मोन्डलले दिएको लो क्रसमा ६ यार्ड बक्सभित्र अभिषेक पहिलो टचमा चुकेपनि डिफेन्डरले क्लियर गर्न नसक्दा सहजै गोल गर्न सफल रहे ।

पहिलो हाफको अन्तिम मिनेटमा अभिषेकले व्यक्तिगत दोस्रो गोल गरे । विलिस प्लाजाले दिएको थ्रु बललाई छाङतेले नियन्त्रणमा लिन नसक्दा अभिषेकले गरेको प्रहार गोल भएको थियो ।

दोस्रो हाफको सुरुवातमा नै मोहमडनले गोल खान पुग्यो । अहमदाबादका खेलाडीले दिएको पासलाई क्लियर गर्ने क्रममा बल गोलरक्षकलाई बिट हुँदै गोल हुन पुगेको थियो । खेलमा मोहमडनले एकपक्षीय दबाब कायम गरेपनि गोल थप्न भने सकेन ।

६० औं मिनेटमा पेनाल्टी क्षेत्र बाहिरबाट अभिषेकले गरेको प्रहार गोलरक्षक इप्रोदिप दासको हातमा पुग्यो । ६८ औं मिनेटमा मैदानको मध्य भागबाट गोलरक्षक पोजिसनमा नभएको अवस्थामा अभिषेकले गरेको प्रहारलाई गोलरक्षक दासले जेनतेन बचाएका थिए ।

७६ औं मिनेटमा अभिषेकको हेडर सिधै गोलरक्षकको हातमा पुग्यो । त्यसको एक मिनेटपछि शेख फैयाजको शक्तिशाली प्रहार क्रसबारमा लाग्दा मोहमडनले अग्रता बढाउन सकेन ।

खेलको ८१ औं मिनेटमा अहमदाबादका लागि अर्का नेपाली फरवार्ड राजेश परियारले डेब्यु गरे । उनी नाइजेरियन फरवार्ड स्टानली इजीको स्थानमा मैदान छिरेका थिए । खेलको ८५ औं मिनेटमा अभिषेकको स्थानमा सम्साद अली मैदान प्रवेश गरेका थिए । ८९ औं मिनेटमा अलीकै पासमा शेख फैयाजले गोल गर्दै मोहमडनलाई ४-१ ले अघि बढाए ।

लगातार दोस्रो जितसँगै मोहमडन अंक तालिकाको शीर्ष स्थानमा पुगेको छ । मोहमडनको ६ अंक छ । दोस्रो स्थानको भवानीपुरको १ खेलमा ३ अंक छ । १-१ खेल खेलेका अहमदाबाद, घरवाल र बेंगलुरु युनाइटेड अंकविहिन छन् । आज हुने दोस्रो खेलमा घरवाल र बेंगलुरु भिड्दैछन् ।