काठमाडौं (हाम्रो खेलकुद) – राष्ट्रिय फुटबल टोली तथा सहिद स्मारक ए डिभिजन लिग च्याम्पियन मछिन्द्र क्लबका गोलकिपर विशाल श्रेष्ठको परिवारका ७ मध्ये ५ जना कोरोना संक्रमणबाट मुक्त भएका छन् ।

विशालसहित उनका हजुरबुबा, बुबा, आमा, श्रीमती, छोरी र मामाको छोरालाई असोज १० गते कोरोना संक्रमणको पुष्टी भएको थियो । दुई दिनअघि गरिएको अर्को परिक्षणमा विशालका बाबु हिरालाल श्रेष्ठ र श्रीमती इलिशा श्रेष्ठको परिक्षण भने फेरि पनि पोजेटिभ देखिएको छ । बाँकीको भने नेगेटिभ आएको विशालले जानकारी दिए ।

लक्षण देखिएकोले उनको परिवार संक्रमण पुष्टीको ५ दिन अघिबाट होम आइसोलेसनमा बसेको विशालले जानकारी दिए । ‘लक्षण देखिएपछि नै हामी आइसोलेट भएका थियौं । संक्रमण हुन सक्छ भन्नेमा मानसिक रुपमा तयार थियौं’, विशालले भने, ‘परिक्षण गराउँदा सबैलाई पोजेटिभ देखियो । सबै जना घरमै आइसोलेसनमा बस्यौं ।’

सकेसम्म संक्रमणबाट जोगिन प्रयास गर्ने र संक्रमण भएको अवस्थामा पनि आफुलाई आइसोलेट गरेर बस्न विशालले सुझाव दिएका छन् । ‘सामान्य खाना, नियमित बेसार पानी पिउने, वाफ लिने गर्यौं’, उनले थपे, ‘डाक्टरको सल्लाहमा केहि भिटामिन पनि लिएका थियौं । त्यस्तो गाह्रो भएन ।’

राष्ट्रिय टोलीमा पहिलो पटक बन्द सत्रमा बोलाइएका एरिक विष्टलाई पनि साउन अन्तिममा कोरना संक्रमण भएको थियो । पछि उनी कोराना मुक्त भएका थिए ।