एजेन्सी – युइएफए नेसन्स लिग ‘बी’ ४ को शीर्षस्थानमा रहेको वेल्स तेस्रो राउन्डको खेलमा आयरल्यान्डसँग गोलरहित बराबरीमा रोकिएको छ ।

वेल्स घरेलु टोलीसँग गोलरहित बराबरीमा रोकिएको हो । बराबरीपछि पनि वेल्स समूहमा ३ खेलबाट ७ अंक जोडेर शीर्षस्थानमा रहेको छ । आयरल्यान्ड २ अंक जोडेर तेस्रो स्थानमा रहेको छ ।

एभिभा स्टेडियम डब्लिनमा आइतबार साँझ भएको खेलमा घरेलु टोलीले वेल्सलाई दवावमा राखेपनि गोल गर्न असमर्थ बन्दा बराबरीमा रोकिन पुग्यो । खेलको जेफ हन्डरिकको पासमा रोबर्ट ब्राडीको प्रहारलाई वेल्सका डिफेन्डर जोइ रोन्डोनले ब्लक गरे ।

२७औं मिनेटमा कप्तान आरोन राम्सेको पासमा ह्यारी विल्सनको प्रहारलाई आयरल्यान्डका गोलरक्षक डारेन रानडल्पले विफल पार्दै वेल्सको अग्रता टारे । त्यसमै प्राप्त कर्नरमा किफिएर मोरको हेडर क्रसबारबाट बाहिरियो । ३३औं मिनेटमा रोबर्ट ब्राडीको प्रहार आकासिदा आयरल्यान्ड अग्रता लिनबाट चुक्यो ।

३८औं मिनेटमा ब्राडीकै क्रसलाई वाइने हेनेसीले गोललाईनबाट बचाउदै आयरल्यान्डको अग्रता टारे । ४३औं मिनेटमा साइरस क्रिस्टिको प्रहार आकासियो । ४५औं मिनेटमा ब्राडीको उत्कृष्ट मुभलाई आयरल्यान्डका कप्तान सेन डफीले मुस्किलले ब्लक गरे ।

दोस्रो हाफमा भने दुवै टोलीले सुस्त खेल पस्क्यो । दुवै टोलीले पोस्टमा गतिलो पोस्ट आक्रमण बुन्न सकेन् । ८४औं मिनेटमा घरेलु टोली १० खेलाडीमा समेटिएपनि त्यसको फाइदा वेल्सल उठाउन सकेन ।

डेलान लेभिटलाई फल गरेपछि जेम्स म्याक्लिन दोहोरो पहेलो कार्ड खादै मैदानबाट बाहिरिए । ८६औं मिनेटमा डेभिड ब्रुक्सको प्रहारलाई गोलरक्षक डारेन रान्डलफले बचाउदै खेललाई गोलरहित बराबरीमा टुंग्याए ।