एजेन्सी – युइएफए नेसन्स लिग ‘ए’ ४ को शीर्ष होडमा रहेको इंग्ल्यान्ड र बेल्जियमले आज राति आ–आफ्नो प्रतिद्धन्द्धीसँग प्रतिस्पर्धा गर्दैछ ।

इंग्ल्यान्डले घरेलु मैदानमा डेनमार्कसँग प्रतिस्पर्धा गर्दा बेल्जियम आइसल्यान्ड भ्रमणमा निस्कनेछ । दुवै खेल राति १२ः३० बजे हुनेछ । इंग्ल्यान्ड डेनमार्कलाई पराजित गर्दै शीर्षस्थानमै रहने योजनामा रहँदा बेल्जियम पनि आइसल्यान्डमाथि जित निकाल्दै इंग्ल्यान्डमाथि दवाव बढाउने लक्ष्यमा हुनेछ ।

तीन चरणको खेल सकिदा इंग्ल्यान्ड ७ अंक जोडेर शीर्षस्थानमा रहँदा बेल्जियमको ६ अंक रहेको छ । डेनमार्कको ४ तथा आइसल्यान्डले खाता खोल्न सकेको छैन ।

युवा खेलाडीको बाहुल्यता रहेको इंग्ल्यान्डसँग डोमिनिक काल्भर्ट लेविन, मासन माउन्ट, मार्कुस रासफोर्ड, डिक्लन राइस, किरिएन ट्रिपिएर, ट्रेन्ट एलेक्सान्डर अर्नाेल्ड, ह्यारी मिगुएर, केल वाल्कर, एरिक डाएर, जोर्डन हेन्डरसन, केल्भिन फिलिप्स, ह्यारी केन, रिस जेम्स, जाडोन सान्चोसँगै गोलरक्षक जोर्डन पिकफोर्डको साथ रहेको छ ।

यता, डेनमार्कसँग युस्सुफ पलसेन, मार्टिन ब्रेथवेट, थोमस डिलाने, क्रिस्टियन इरिक्सन, एन्ड्रिएस क्रिस्टेन्सन, सिमोन केजाइर, ड्यानिल वास र गोलरक्षक कास्पर स्माइकेल रहेको छ । यि दुई टोली हालसम्म तीनपटक खेलेका छन् । दुई खेल इंग्ल्यान्डले आफ्नो पक्षमा पार्दा एक खेल बराबरीमा सकिएको छ ।

यस्तै अर्काे खेलमा बेल्जियमसँग केभिन डि ब्रुयन, रोमेलु लुकाकु, ड्रिएस मेर्टिन्स, लियान्द्रो ट्रोससार्ड, टिमोथी कास्टाग्ने, एक्सेल विस्टेल, थोमस म्युनियर र गोलरक्षक सिमोन मिग्नोलेट छन् ।