गुवाहाटी
भारतको गुवाहाटीमा जारी ६४ औ संस्करणको बोर्डोलोई ट्रफी अन्र्तगत लिग चरणको अन्तिम खेलमा आईतबार नेपालको रुस्लान थ्रीस्टार र भारतीय आई लिग क्लब सिलोङ लाजोङबीच प्रतिस्पर्धा हुदैछ ।
समान ४ अंक जोड्दै दुवै टोली समुह ए को शिर्ष स्थानमा छन् । लिग चरणको अन्तिम खेलले समुह एको विजेता टोलीको टुङ्गो लाग्नेछ । खेल गुवाहाटीको नेहरु स्टेडियममा स्थानिय समय अनुसार साझ ७ बजे सूरु हुनेछ । सोही समुहमा रहेको ओयल इन्डिया दुई अंक जोड्दै तालिकाको तेस्रो स्थानमा छ । अंक विहिन बारक फुटबल क्लब तालिकाको पुछारमा छ । आईतबार अपरान्ह ४ बजे ओयल इन्डिया र बारकले पनि लिग चरणको आफ्नो खेलमा प्रतिस्पर्धा गर्नेछन् ।
थ्रीस्टारले पहिलो खेलमा नागाल्याण्डको बारक फुटबल क्लबलाई ६–१ ले हराएको थियो भने लिग चरणको आफ्नो दोस्रो खेलमा शुक्रबार ओयल इन्डिया फुटबल क्लबसंग १–१ गोलको बराबरी खेलेको थियो । सिलोङ लाजोङ उद्घाटन खेलमा ओयल इन्डियासंग १–१ गोलको बराबरीमा रोकिएपनि दोस्रो खेलमा बारक फुटबल क्लबलाई ५–० गोल अन्तरले पराजित गरेको थियो ।
थ्रीस्टार क्लबका मुख्य प्रशिक्षक मेघराज केसीले समुह विजेताका रुपमा सेमिफाईनल प्रवेश गर्ने आफ्नो लक्ष्य रहेको बताउदै स्पष्ट जितका लागि सिलोङ लाजोङबिरुद्ध उत्रने बताएका छन् । ‘एक दिनको आराममा खेलाडी मैदानमा उत्रने हुदा पक्कै पनि थकित छौ तर प्रतिद्धन्द्ी बलियो भएकाले मेहनत गरेर समुह विजेताका रुपमा सेमिफाईनल प्रवेश प्रयास गर्नेछौ ।’ केसीले भने । थ्रीस्टारले शुक्रबार मात्र ओयल इन्डियाबिरुद्ध खेलेको थियो । एकदिनको बिश्रामपछि टोली सिलोङ लाजोङ विरुद्ध उत्रन लागेको छ । प्रशिक्षक केसीले भने ‘लिग चरणको नतिजा हेर्दा प्रतिद्धन्द्ी क्लब पनि हामी जतिकै समान ४ अंक बनाएर शिर्ष स्थानमा छ, सिलोङलाई कमजोर आक्ने गल्ति हामीले गर्ने छैनौ ।’ उनले थपे ‘हाम्रो खेलको अगाडी हुने सोही समुहको अघिल्लो खेल पनि हेर्नेछौ, त्यस खेलले समिकरणमा पार्ने प्रभावलाई ध्यानमा राखेर सिलोङसंगको खेलको रणनीति तयार पार्नेछौ ।’
चोटका कारण प्रकाश बुढाथोकी र अघिल्लो खेलमा रातो कार्ड ब्यहोरेका विजय धिमाल आईतबारको खेलमा उपलब्ध हुने छैनन । थ्रीस्टार र सिलोङ लाजोङको खेल बराबरीमा सकिए दुवै टोली सेमिफाईनल पुग्नेछन् । तर बारकबिरुद्धको आईतबार हुने पहिलो खेलमा जित निकाले ओयल इन्डियाको पनि अन्तिम ४ मा स्थान पुग्ने सम्भावना कायमै रहनेछ ।
