एजेन्सी – कप्तान पिएरे एमेरिक औवामियाङले ह्याट्रिक पुरा गरेपछि लन्डन क्लब आर्सनलले इएफएल कपको दोस्रो राउन्डमा च्याम्पियन्ससिप क्लब वेस्ट ब्रुम अल्वियोनमाथि ६–० को फराकिलो जित निकालेको छ ।

दि हाथ्रोन्समा बुधबार राति भएको एक पक्षीय खेलमा निकोलस पेपे, बुकायो साका र एलेसान्द्रे लाकाजेटले पनि समान एक गोल थपे । पहिलो र दोस्रो हाफमा समान तीन गोल निस्किएको थियो ।

खेलको १७औं मिनेटमा कप्तान औवामियाङको गोलबाट प्रिमियर लिगमा खराव सुरुवात गरेको आर्सनलले अग्रता लिएको थियो । ४५औं मिनेटमा औवामियाङले व्यक्तिगत र टोलीका लागि दोस्रो गोल गर्दै आर्सनलको अग्रता दोब्बर पारे । पहिलो हाफकै अन्त्यतिर निकोलस पेपेले गोल गर्दै आर्सनललाई ३–० ले अघि बढाए ।

आर्सनल यतिमै रोकिएन । ५०औं मिनेटमा बुकायो साकाले गाल गर्दै आर्सनललाई ४–० ले अघि बढाए । ६३औं मिनेटमा कप्तान औवामियाङले ह्याट्रिक पुरा गरेपछि आर्सनल फराकिलो जिततर्फ अग्रसर बन्यो । ६९औं मिनेटमा एलेसान्द्रे लाकाजेटले गोल गर्दै आर्सनललाई ६–० को फराकिलो जित दिलाए ।

यस्तै अर्काे खेलमा साउथह्याम्टनले लिग २ टोली न्युपोर्ट काउन्टीमाथि ८–० को फराकिलो जित दर्ता गरेको छ । साउथह्याम्टनको फराकिलो जितमा मोहमेद इलयोनोउसीले ह्याट्रिक पुरा गर्दा अर्मान्डो बोर्जाले दुई तथा नाथन टेला, केल वाल्कर्स पिटर्स र नाथन रेडमन्डले समान एक गोल गरे । पहिलो हाफमा तीन तथा दोस्रो हाफमा ५ गोल निस्किएको थियो ।

यस्तै बर्नलेले प्रिमियर लिग प्रतिद्धन्द्धी न्युक्यासल युनाइटेडलाई पेनाल्टी सुटआउटमा ४–३ ले पराजित गर्दै तेस्रो चरणमा प्रवेश गरेको छ । निर्धारित ९० मिनेट र अतिरिक्त समयमा पनि कुनै गोल निस्कन नसकेपछि खेल पेनाल्टी सुटआउटमा लम्बिएको थियो ।

बर्नलेका क्रिस वुड, एस्ले बार्नेस, डिवाइट म्याक्नेल र चाली टेलरले गोल गर्दा जोस ब्रोनहिलले गोल गर्न सकेनन् । न्युक्यासलका जोसेप विललक, जोइलिन्टन र सिन लङ्सटाफले गोल गर्दा एलान सेन्ट म्याक्सिमिन, मिगुइल अल्मिरोनले गोल गर्न सकेनन् ।